गठबन्धनलाई निश्चिन्त भएर मतदान गर्नुहोस्ः डिना

५ कार्तिक, हेटौंडा । सत्तारुढ गठबन्धनको तर्फबाट मकवानपुर क्षेत्र १ का उम्मेदवार नेपाली कांग्रेस केन्द्रीय सहमहामन्त्री महालक्ष्मी उपाध्याय ‘डिना’ले आफू सांसद बन्नका लागि मात्र नभई मकवानपुरे जनताको सुखदुःखमा साथै रहन उम्मेदवार भएको बताएकी छिन् । 
कांग्रेस हेटौंडा–६ नम्बर वडाको आयोजनामा भएको चियापान तथा शुभकामना आदानप्रदान कार्यक्रममा उनले समानुपातिकबाटै पनि आफू सांसद् बन्नसक्ने भन्दै प्रत्यक्ष जितेरै जनताको पीरमर्कामा साथै रहने अठोटका साथ आएको बताइन् । 
उपाध्यायले नेपालको संविधान संरक्षणको लागि गठबन्धन आवश्यकता परेको उल्लेख गर्दै गठबन्धन आबद्ध दलहरुले निश्चिन्त भएर मतदान गर्नुपर्नेमा जोड दिइन् । आफ्नो पोल्टामा आएको समानुपातिक सांसद पद छोडेर जनताको विश्वासको मत लिन निर्वाचनमा होमिएको बताइन् । यसअघि सांसद् हुँदा संविधान निर्माणमा उल्लेख्य भूमिका खेलेको भन्दै धर्मको रक्षाको लागि पनि आफू उम्मेदवार रहेको बताइन् । 
मकवानपुरलाई विकास निर्माणको नमूना बनाउन आफूलाई मकवानपुरबासीले विश्वासको मत दिएर विजयी गराउनेमा विश्स्त रहेको डिनाको भनाई थियो । सहकारीमार्फत मकवानपुरमा आयआर्जन र जिविकोपार्जनमा खेलेको भूमिकालाई सबै मकवानपुरबासीले प्रत्यक्ष देखिरहेकाले पनि यस पटक जनताको मन जित्नेमा आशावादी रहेको उनले बताइन् ।