माओवादी केन्द्रको घोषणापत्रः शासकिय स्वरुप फेर्ने प्रस्ताव

१४ कार्तिक, हेटौंडा । नेकपा माओवादी केन्द्रले आगामी मङ्सिर चार गते हुन लागेको प्रतिनिधि सभा र प्रदेश सभा निर्वाचनका लागि आफ्नो घोषणापत्र सार्वजनिक गरेको छ । अध्यक्ष पुष्पकमल दाहाल प्रचण्डले आज सार्वजनिक गर्नुभएको घोषणात्रमा प्रत्यक्ष निर्वाचित कार्यकारी राष्ट्रपतिको एजेण्डालाई अघि सारिएको छ । 
घोषणापत्र सार्वजनिक गर्दै प्रचण्डले गणतन्त्रलाई प्रभावकारी बनाउन संविधान संसोधन गरेरै पनि विद्यमान शासकीय स्वरूप परिवर्तन गर्नुपर्ने आवश्यकता देखिएको बताएका छन् । संघमा ५१ प्रतिशत मतद्वारा प्रत्यक्ष निर्वाचित कार्यकारी राष्ट्रपति र राष्ट्रपतिद्वारा गठित मन्त्रीमण्डल रहने माओबादीको घोषणापत्रमा उल्लेख छ । 
प्रदेशमा पनि संघमा जस्तै प्रत्यक्ष निर्वाचित प्रदेश प्रमुख र प्रदेश प्रमुखद्वारा गठित मन्त्रीमण्डल रहने र विधायन क्षेत्रमा मात्र केन्द्रित हुने प्रदेश सभाको गठन गरिने योजना माओवादीको छ । त्यस्तै शुसाशन अभिवृद्धिका लागि उच्चस्तरीय सम्पत्ति छानबिन आयोग गठन गर्ने विषय पनि माओवादी केन्द्रले घोषणा पत्रमा उल्लेख गरेको छ । 
राजनीतिक परिवर्तनको मूल मर्मलाई साधन र माध्यम बनाएर जनताको जीवन फेर्नु र नयाँ नेपाल बनाउनु आफूहरूको योजना रहेको भन्दै यसलाई आत्मसात् गरी व्यवस्थालाई रक्षा र अवस्थामा परिवर्तन माओवादी केन्द्रको नेतृत्वमा सम्भव भएको प्रतिबद्धतापत्रमा उल्लेख गरिएको छ ।