कांग्रेस मकवानपुरले गर्यो १६ जनालाई कारबाही

२९ कार्तिक, हेटौंडा । नेपाली कांग्रेस मकवानपुरले आसन्न प्रतिनिधि सभा र प्रदेश सभा सदस्य निर्वाचनको पूर्वसन्ध्यामा १६ जना नेता तथा कार्यकर्ताहरुलाई कारबाही गरेको छ । कारबाहीमा पर्नेहरुमा पूर्व महासमिति सदस्यदेखि पार्टीका क्रियाशिल सदस्यसम्म रहेका छन् । 
मंगलबार पार्टी कार्यलयमा पत्रकार सम्मेलन गर्दै कांग्रेस मकवानपुरका सभापति बुद्ध लामाले पार्टीको निति विपरित आसन्न निर्वाचनमा उम्मेदवारी दिने र गलत आचरण गर्नेहरुलाई कारबाही गरिएको जानकारी दिए । ‘कांग्रेसको निति र वर्तमान गठबन्धनको उद्देश्य विपरित चुनावमा आफु खुशी उम्मेदवार बनेका र उम्मेदवारको प्रस्तावक र समर्थक बसेकाहरुलाई कारबाही गरेका छौं । पटक पटक पार्टी निति विपरितको गतिविधि सच्याउन आग्रह गरेपनि अटेर गरेपछि कारबाही गरिएको हो । सच्चिने अवसर दिएका थियौं तर साथीहरुले मान्नु भएन । हामी कारबाही गर्न बाध्य भयौं ।’ सभापति लामाले भने ।
कांग्रेसमा रहेर पनि अन्य दलको चुनाव चिन्ह लिएर उठेकाहरुले आफुहरु कांग्रेसमै रहेको भन्ने भ्रम सिर्जना गरेर मतदाताहरुलाई अन्यौलमा पारेपछि कारबाही गर्न वाध्य भएको जिल्ला अनुशासन समितिका संयोजक प्रभात कुमार दाहालले जानकारी दिए । कांग्रेस मकवानपुरले कारबाही गरेका नेताहरुमा स्वतन्त्र पार्टीबाट प्रतिनिध सभामा उम्मेदवार बनेका पूर्व महासमिति सदस्य भरत पराजुली, वीपी कांग्रेसको केन्द्रीय उपाध्यक्ष एवं समानुपातिक उम्मेदवार, पूर्व महासमिति सदस्य रिता खनाल रहेका छन् । 
यसैगरी विभिन्न पार्टीबाट प्रत्यक्ष र समानुपातीक उम्मेदवार बनेका किशोर राना, धिरज विक्रम न्यौपाने, कर्णबहादुर थिङ्, गोपी अधिकारीलाई पनि कारबाही गरेको छ । यस्तै उम्मेदवारहरुको प्रस्तावक र समर्थक बसेको र पार्टी निति विपरित काम गरेको भन्दै पार्टीका पूर्व प्रदेश सभा क्षेत्रीय सभापति सुजन गोपाली, नेपाल तरुण दलका जिल्ला उपाध्यक्ष निराजन बर्तौला, प्रदेश क्षेत्रीय सचिव नवराज पौडेल, भिमफेदी गाउँपालिका कांग्रेसका उपसभापति रुद्र लामा लगाएतलार्य कारबाही गरिएको छ ।