हेटौँडामा पत्रकारिता तालिम शुरु

१० भदौ, हेटौँडा । नेपाल पत्रकार महासंघ मकवानपुरको आयोजनामा शुक्रबारदेखि हेटौँडामा २ दिने पत्रकारिता तालिम शुरु भएको छ । बालबालिका बेचबिखन एवं सुरक्षाको विषयमा तालिम दिईएको हो ।

तालिम शुभारम्भ कार्यक्रममा बोल्दै महिला तथा बालबालिका कार्यालय मकवानपुरकी महिला विकास अधिकृत शोभा शाहले मकवानपुर महिला एवं बालबालिका बेचबिखनको दृष्टिकोणले जोखिमपूर्ण जिल्ला रहेको बताईन् । उनले सरकारले पनि मकवानपुरलाई महिला बेचबिखनको दृष्टिकोणले २६ जोखिमपूर्ण जिल्लामा राखेर काम गरिरहेको भन्दै संचारक्षेत्रबाट महिला एवं बालबालिका बेचबिखन रोकथामका लागि कलम चलाउनुपर्ने बताईन् । उनले संचारकर्मीले सचेतना अभिबृद्धि र गलत गतिविधि गर्नेलाई हुने कारवाहीका बारे उजागर गर्न सके महिला एवं बालबालिका बेचबिखनको क्रम घट्ने बताईन् । कार्यक्रममा बोल्दै नेपाल पत्रकार महासंघका पूर्व केन्द्रिय अध्यक्ष एवं सहजकर्ता शिव गाउँले महिला र बालबालिकाको क्षेत्र संवेदनशिल विषय भएकाले संचार क्षेत्रले कलम चलाउँदा सचेत हुनुपर्नेमा जोड दिए । तालिममा  गाउँले र बरिष्ठ पत्रकार प्रताप विष्टले सहजिकरण गरिरहेका छन् ।

बाल कल्याण समाज मकवानपुरको सहजिकरणमा भईरहेको तालिममा मकवानपुरका छापा एवं विद्युतिय संचारमाध्यममा ३० जनाको सहभागिता रहेको छ ।