बागमती गोल्डकपको उपाधि भुट्निजले जित्यो

४ माघ, हेटौंडा । बागमती गाउँपालिका खेलकुद विकास समितिको आयोजनामा सम्पन्न बागमती गोल्डकपको उपाधी अमेरिकाको भुट्निज स्पोर्टसले जितेको छ ।
मंगलबार सम्पन्न पाँचौं संस्करणको बागमती गोल्डकप फुटबल प्रतियोगिता–२०७९ को फाइनलमा संकटा क्लबलाई सडन डेथमा पराजित गर्दै भुट्निजले गोल्डकपको उपाधि जितेको हो ।
बागमती गाउँपालिका–८ स्थित जनता माविको खेल मैदानमा भएको खेलको निर्धारित समयमा भुट्निज स्पोर्टसका लागी प्रविण वस्नेत र संकटाका लागी सुनिल बलले २÷२ गोल गरेका थिए । खेलको १० औं मिनेटभित्र भुट्निजले दुई गोलको अग्रता बनाएपनि जितको लागि सडनडेथसम्म पुग्नु परेको थियो । 
भुट्निजका ८ खेलाडीको पेनाल्टी गोलमा परिणत हुँदा संकटाका ७ जना खेलाडीको पेनाल्टी प्रहार गोलमा परिणत भएपनि सुरजज्यु ठकुरीको प्रहार भने भुट्निजका गोलरक्षक पुजन थापा मगरले बचाउँ गरेका थिए । भुट्निजका गोलरक्षक मगर नै खेलको म्यान अफ दी म्याच घोषित भए । उनले नगद ५ हजार सहित ट्रफि प्राप्त गरे । 
भुट्निजका लागि प्रविण बस्नेतले खेलको पहिलो मिनेट मै गोल गर्दै अग्रता दिलाएका थिए । उनै बस्नेतले खेलको छैठौं मिनेटमा व्यक्तिगत दोस्रो गोल गर्दै अग्रता दोब्बर बनाएका थिए । 
तर संकटाका सुनिल बलले खेलको १० औं र २० औं मिनेटमा गोल गर्दै खेल बराबरीमा ल्याएका थिए । सुनिलले पहिलो गोल हेडमार्फत् गरेका थिए भने दोस्रो गोल पेनाल्टिमार्फत गरेका थिए । २० औं मिनेटमा डिबक्सभित्र भुट्निजका खेलाडीले हातले बल छोएपछि संकटालाई पेनाल्टीको अवसर प्राप्त भएको थियो ।
प्रतियोगिताको सर्वोत्कृष्ट खेलाडी बनेका संकटाका सुरजज्यू ठुकरीले नगद ५१ हजार रुपैयाँ प्राप्त गरेका छन् । यस्तै भुटनिजका गोलरक्षक पुजन मगर, फरवार्ड प्रविण बस्नेत र प्रशिक्षक प्रदीप हुमागाईं तथा संकटाका डिफेन्डर कुलदीप कार्की र मिडफिल्डर सुनिल बल उत्कृष्ट घोषित भए । उनीहरुले जनही १५ हजार रुपैयाँसहित ट्रफी प्राप्त गरेका छन् ।
यो जीतसँगै वाग्मती गोल्डकपले नयाँ विजेता प्राप्त गरेको छ । दुवै टोली यस प्रतियोगिताको फाइनलमा पुगेको यो पहिलो पटक हो । पौष २४ गतेबाट सुरु भएको प्रतियोगितामा ७ वटा ‘ए’ डिभिजन क्लब, दुई स्थानीय र एक विदेशी टिमको सहभागिता रहेको थियो ।