मकवानपुर पास्टर एशोसिएशनको अध्यक्षमा थाहाका पास्टर गोपाली चयन

१२ माघ, हेटौंडा । मकवानपुर पास्टर एशोसिएशनको अध्यक्षमा थाहाका पास्टर सुवास गोपाली चयन भएका छन् । बिहीबार भएको मकवानपुर पास्टर एशोसिएशनको १२ औँ अबिधेशनले गोपालीको अध्यक्षतामा ११ सदस्यीय नयाँ कार्यसमिति चयन गरेको हो ।
समितिको उपाध्यक्षमा उत्तम थोकर, कुमार पाख्रिन, विष्णु लाल प्रजा र रमिला शर्मा, सचिव सागर श्रेष्ठ, कोषाध्यक्ष मदन सिं सिन्तान चयन भएका छन् । यस्तै सदस्यहरुमा पुर्ण लामा, सामेल राई,विजय बजगाई र मिन बहादुर रुम्बा चयन भएका छन् ।
नवनिर्वाचित अध्यक्ष गोपालीले आफ्नो कार्यकालमा मकवानपुर पास्टर एशोसिएशनलाई स्वर्णिम बर्ष र दिन बनाउने बताए । उनले एशोसिएशनले सबै क्षेत्रलाई समेटेर नेतृत्व, व्यक्तित्व विकास गर्न तर्फ लाग्ने भन्दै ईसाईहरुको हकहितको लागि आवाज उठाउन सदैव अग्रसर हुने प्रतिवद्धता व्यक्त गरे ।
संस्थाले गरेका गतिविधिहरुलाई पत्रपत्रिका, रेडियो, टेलिभिजन लगायतको माध्यमबाट प्रचारप्रसार गर्ने ठुला ठुला सभा सम्मेलन, चंगाई कार्यक्रम राख्ने, खिष्ट्रियन सामाजिक, सांस्कृतिक, धार्मिक पर्व र उत्सवहरुलाई बढवा दिने, मण्डली मण्डलीबीच एकता र जागृति ल्याउन भुमिका खेल्ने, मकवानपुर पास्टर एशोसिएशनलाई आधिकारिक रुपमा दर्ता गर्ने, आफ्नै जग्गा र भवनको लागि पहल गर्ने लगायतको काम गर्ने योजना अघि सारेको अध्यक्ष गोपालीले बताए ।
एशोसिएशनका अध्यक्ष दिपक भोलनको सभाध्यक्षतामा भएको कार्यक्रममा एनसिएफ नेपालको अध्यक्ष रेभरेण्ड पास्टर हनोक तामाङ,हेटौँडा उपमहानगरपालिकाकी मेयर मिना लामा लगायतले बधाई तथा सफल कार्यकालको शुभकामना दिएका थिए ।