६ मन्त्री र ३ राज्यमन्त्री सहित मधेश प्रदेशको मन्त्रिमण्डल विस्तार

२१ माघ, हेटौंडा । मधेस प्रदेशको मन्त्रिमण्डल विस्तार भएको छ । शुक्रबार मुख्यमन्त्री सरोजकुमार यादवले मन्त्रिमण्डल विस्तार गरेका हुन् । उनले मन्त्रिमण्डलमा छ मन्त्री र तीन राज्यमन्त्रीलाई सामेल सामेल गराएका छन् ।
नवनियुक्त मन्त्रीहरूले शुक्रबार पद तथा गोपनीयताको शपथ लिएका छन् । नवनियुक्त छ मन्त्रीले प्रदेश प्रमुख हरिशङ्कर मिश्रबाट र तीन राज्यमन्त्रीले मुख्यमन्त्री यादवबाट पद तथा गोपनीयताको सपथ लिएका हुन्
सत्ता गठबन्धन दलमध्येका नेकपा (माओवादी केन्द्र) लाई सरकारमा सहभागी नगराई मुख्यमन्त्री यादवले नेकपा (एमाले), जनता समाजवादी पार्टी (जसपा) र जनमत पार्टीलाई समेटेर मन्त्रिमण्डल विस्तार गरेका छन् ।
शुक्रबार विस्तारित मन्त्रिमण्डलमा जसपाबाट सुरिताकुमारी साहलाई सामाजिक विकास र सिङ्गासन सा कलवारलाई खानेपानी तथा ऊर्जा विकास मन्त्रालयको जिम्मेवारी दिइएको छ ।
यस्तै एमालेबाट राजकुमार लेखीलाई कानून, न्याय तथा प्रदेशसभा मामिलामन्त्री र शत्रुधनप्रसाद सिंहलाई गृह तथा सञ्चार मन्त्रालयको जिम्मेवारी दिइएको छ भने मोहम्मद जयद आलमलाई महिला, बालबालिका युवा तथा खेलकुदमन्त्री बनाइएको छ ।
जनमत पार्टीबाट संसदीय दलका नेता महेशप्रसाद यादवले शिक्षा, विज्ञान प्रविधि तथा वाणिज्य मन्त्रालयको जिम्मेवारी पाएका छन् । 
यसैगरी राज्यमन्त्रीमा जसपाका शेख अबुल कलाम आजादलाई सामाजिक विकास मन्त्रालय, एमालेका केशव राय चौधरीलाई गृह तथा सञ्चार राज्यमन्त्री र जनमत पार्टीका सञ्जयकुमार यादवलाई भूमि व्यवस्था, कृषि तथा सहकारी मन्त्रालयको राज्यमन्त्रीमा नियुक्त गरिएको छ ।