योजनाको फाइल अगाडि नबढाएको भन्दै वडा अध्यक्ष सिग्देलद्वारा महाशाखा प्रमुख साहलाई गालीगलौज

४ फागुन, हेटौंडा । हेटौंडा उपमहानगरपालिका वडा नम्बर–४ का वडा अध्यक्ष नवीन सिग्देलले एक कर्मचारीलाई गालिगलौज गरेका छन् । वडा अध्यक्ष सिग्देलले उपमहानगरपालिकाका महाशाखा प्रमुख सत्यनारायण शाहलाई अपशब्द प्रयोग गर्दै गालिगलौज गरेका हुन ।
बिहीबार कार्यालय प्रवेश गर्ने क्रममा उपमहानगरपालिकाको शहरी विकास महाशाखाका प्रमुखको जिम्मेवारीमा रहेका सिनियर इन्जिनियर शाहलाई आफ्नो काम नगरेको भन्दै वडा अध्यक्ष सिग्देलले गलीगलौजसहित हातपातको प्रयास गरेका हुन् ।
वडा अध्यक्ष सिग्देलले वडाको योजनाको फाइल अगाडी नबढाएको र आफ्नो काम नगरेको भन्दै उपमहानगरपालिका प्रवेश गर्ने मुल गेट अगाडी नै अपशब्द प्रयोग गर्दै हातपातको प्रयास गरेको एक प्रत्यक्षदर्शीले बताए । 
कार्यालय प्रवेश गर्दै गरेका शाहलाई आफ्नो योजनाको फाइल अगाडी नबढाउने भए कार्यालयमा नबस्न भन्दै अपशब्द प्रयोग गर्दै गाली गरेको उनले बताए । 
गाली गर्दै कार्यालय परिसरबाट बाहिरिन लागेका वडा अध्यक्ष सिग्देल पुनः फर्कीएर शाह माथि हातपात गर्न अघिसकेका थिए । तर, केही व्यक्तिहरुले उनलाई रोकेर बाहिर पठाएका थिए ।
महाशाखा प्रमुख साह माथि अभद्र व्यवहार भएको भन्दै उपमहानगरपालिकाको शहरी विकास महाशाखाका कर्मचारीहरुले आफ्नो काम रोकेका छन् । उनीहरुले साहले आफ्नो स्वार्थ राखेर काम नगरेको भए कानुन अनुसार कारवाही गर्नुपर्ने अन्यथा जनप्रतिनीध भएकै भरमा कसैलाई गालीवेज्जती गर्न नहुने भन्दै कारवाहीको माग गरेका छन् ।