गोंगबु घटनाबारे छानबिन गर्न समिति गठन

४ फागुन, हेटौंडा । यातायात व्यवसायीले गएको सोमबार गोंगबुमा गरेको आन्दोलनमा भएको क्षति, लुटपाट र प्रहरीतर्फबाट भएका कमजोरीबारे जाँचबुझ गर्न समिति गठन भएको छ । 
प्रहरी प्रधान कार्यालय, नक्सालले घटनाबारे छानबिन गर्न उपत्यका प्रहरी कार्यालय, रानीपोखरीका प्रहरी नायब महानिरीक्षक मसउद आलम खाँको नेतृत्वमा पाँच सदस्यीय छानबिन समिति गठन गरेको हो । 
समितिमा उपत्यका प्रहरीका प्रहरी वरिष्ठ उपरीक्षक हिमालय श्रेष्ठ, जिल्ला प्रहरी परिसर, काठमाडौंका एसपी सिताराम रिजाल, उपत्यका प्रहरी कार्यालयका एसपी सानुराम भट्टराई र प्रहरी नायब उपरीक्षक खुमलाल भुसाल सदस्य रहेका छन् । 
शान्तिपूर्ण भनिएको आन्दोलन उग्र कसरी बन्यो भनेर छानबिन गर्न समिति बनाइएको केन्द्रीय प्रहरी प्रवक्ता पोषराज पोखरेलले जानकारी दिए । यसैबीच गोंगबुमा यातायात मजदुर आन्दोलनमा आगजनी, तोडफोड र मोवाईल पसल लुटपाट गर्ने थप १५ जनालाई प्रहरीले पक्राउ गरेको छ ।
काठमाडौं उपत्यका अपराध अनुसन्धान कार्यालयले १५ जनालाई पक्राउ गरेको प्रवक्ता  सोमेन्द्र सिंह राठौरले जानकारी दिएका छन् । ल्होत्से मलमा लुटपाट गर्ने ३ जना र आगजनी, तोडफोड गर्ने १२ जनालाई पक्राउ गरेको हो ।
प्रहरीले सामाजिक सञ्जालमा आएका भिडिओ तथा तस्बिरबाट पहिचान गरी उनिहरूलाई पक्राउ गरेको हो । आगजनी तथा तोडफोड गर्नेमा विद्यार्थी, ड्राइभर, सहचालकलगायत रहेको प्रहरीले जनाएको छ । 
गत सोमबार यातायात मजदुरले आफ्ना मागहरू पूरा गर्नुपर्ने भन्दै आन्दोलन गरेका थिए । यसअघि बुधबार मात्रै प्रहरीले १० जनालाई पक्राउ गरेको थियो ।