प्रदेश नीति तथा योजना आयोग सदस्यमा श्रेष्ठ र खनाल नियुक्त

५ फागुन, हेटौंडा । बागमती प्रदेश नीति तथा योजना आयोगले शुक्रबार पुर्णता पाएको छ । बिहान् बसेको बागमती प्रदेशको मन्त्रिपरिषद बैठकले दुईजना सदस्य थप गरे संगै आयोगले पुर्णता पाएको हो । बैठकले आयोगको सदस्यमा डाक्टर दिपेन्द्र श्रेष्ठ र डाक्टर जयन्त खनाललाई नियुक्त गरेको छ । यसअघि गएको माघ २४ गते आयोगको उपाध्यक्षमा ललितपुरका डा. होमनाथ चालिसेलाई नियुक्त गरिएको थियो । 
यस्तै बैठकले यसअघिको सरकारले जारी गरेको मदन भण्डारी स्वास्थ्य विज्ञान प्रतिस्ठान संचालन ऐन सम्बन्धी संशोधन अध्यादेशलाई निष्कृय पार्ने निर्णय गरेको छ । मदन भण्डारी स्वास्थ्य विज्ञान प्रतिस्थानबाट हेटौंडा अस्पताल अलग गर्ने गरी जारी भएको उक्त अध्यादेशबाट प्रतिष्ठानको अस्तित्वमा समस्या देखिने भएकाले अध्यादेशलाई निष्कृय गर्ने निर्णय गरेको आर्थिक मामिला तथा योजना मन्त्री एवं प्रदेश सरकारका प्रवक्ता जगन्नाथ थपलियाले जानकारी दिए ।
बैठकले प्रदेशमा खर्च कटौतीको प्रस्ताव पनि पारित गरेको मन्त्री तथा प्रदेश सरकारका प्रवक्ता थपलियाले जानकारी दिए । गत माघ १० गतेको मन्त्रिपरिषद बैठकले प्रदेशमा सुशासन कायम गर्न भन्दै आर्थिक मामिला तथा योजना मन्त्रालयका सचिव महेश आचार्यको संयोजकत्वमा खर्च कटौतीका लागि अध्ययन कार्यदल गठन गरेको थियो । 
यस्तै बैठकले निजामती कर्मचारी सम्बन्धी कानून निर्माणका लागि २ वटा प्रतिस्थापन विद्येयकहरु प्रदेशसभा बैठकमा लैजाने निर्णय गरेको छ । प्रवक्ता थपलियाले बैठकबाट प्रदेश निजामती सेवाको गठन संचालन र सेवा सम्बन्धी प्रतिस्थापन विद्येयक र स्थानीय तहका सेवाको गठन तथा संचालन सम्बन्धी प्रतिस्थापन विद्येयक संसदमा लैजाने निर्णय गरेको जानकारी दिए ।
 ती अध्यादेशलाई प्रतिस्थापन विद्येयक ल्याएर कानूनी मान्यता दिन पर्ने भएकाले मन्त्रिपरिषद बैठकले निर्णय गरेको प्रवक्ता थपलियाले बताए । मन्त्रिपरिषद बैठकले संसदमा लैजाने निर्णय गरेको ती प्रतिस्थापन विद्येयकहरु संसदीय समितिमा छलफल भइ फागुन १८ गतेभित्र पास गरी प्रमाणिकरण समेत गर्नुपर्नेछ ।