मकवानपुर गोल्डकपले आज नयाँ विजेता पाउँदै

१० फागुन, हेटौंडा । मकवानपुर जिल्ला फुटबल संघको आयोजनामा जारी प्रतियोगिताबाट मकवानपुर गोल्डकपले आज नयाँ विजेता पाउँने भएको छ । पाँचौ संस्करणको स्थानीय तह सहिद स्मृति मकवानपुर गोल्डकप फुटबलको फाइनल खेल आज हुँदै छ ।
आज दिउँसो ३ बजे हुने फाइनल भिडन्तमा नेपालका चर्चित ‘ए’ डिभिजन क्लव मनाङ मस्र्याङ्दी र हिमालयन शेर्पा एकआपसमा भिड्दै छन् ।  मनाङले सशस्त्र प्रहरीको एपिएफ र शेर्पाले क्यामरुनको एभिनियर एफसीलाई हराउँदै फाइनल यात्रा तय गरेको हो । 
यी दुबै टोली गोल्डकपको फाइनलमा पहिलो पटक भिड्न लागेका हुन् । २०६४ सालबाट सुरु भएको गोल्डकपको पहिलो संस्करणको उपाधि थ्रीस्टार क्लवले जितेको थियो । त्यसपछि नियमित हुन नसकेको यस प्रतियोगितालाई २०७६ सालबाट पुनः निरन्तरता दिइएको हो । 
२०७६ मा प्रतियोगिताको उपाधि घरेलु टिम मकवानपुर ११ ले जितेको थियो भने ०७७ र ०७८ को उपाधि लगातार विभागीय टोली त्रिभुवन आर्मी क्लवले जितेको थियो । 
प्रतियोगिताको विजेताले १५ लाख र उपविजेताले १० लाख रुपैयाँसहित ट्रफी प्राप्त गर्नेछ । यस्तै सर्वोत्कृष्ट खेलाडीले रोयल इन्फिल्ड (बुलेट बाइक) र विधागत उत्कृष्ट खेलाडी तथा प्रशिक्षकले जनही नगद २५ हजार रुपैयाँसहित ट्रफी प्राप्त गर्नेछन् ।
हिमालयन र मनाङ दुबै टिमको उपाधि जित्ने दावी
यसैबीच मनाङ मस्र्याङदी र हिमालयन शेर्पा दुबै क्बले बागमती प्रदेशको राजधानी हेटौंडामा जारी पाँचौ संस्करणको सहित स्मृति स्थानीय तह अन्तर्राष्ट्रिय फुटबल प्रतियोगिताको उपाधि जित्ने दावी गरेका छन् ।
फाइनल खेलको अघिल्लो दिन मंगलबार भएको प्रि–म्याच कन्फ्रेन्समा बोल्दै दुबै टिमका कप्तान तथा प्रशिक्षक र म्यानेजरले उपाधि जित्ने दावी गरेका हुन् ।
कन्फ्रेन्समा बोल्दै मनाङका म्यानेजर शिव लामाले अहिलेको युवा टिमलाई पछिसम्मको लागी तयार गरिरहेको भन्दै पहिलोपटक नेपालमा खेलिरहेका विदेशी खेलाडीहरुले पनि सोचेभन्दा राम्रो खेलिरहेकोले उपाधि जित्ने दावी गरे । यस्तै मनाङका कप्तान दीप कार्कीले फाइनलमा थप सुधारिएको खेल खेल्ने बताउँदै उपाधि जित्ने दावी गरे ।
यता अर्को प्रतिस्पर्धी टिम हिमालयन शेर्पाका प्रशिक्षक सुमन श्रेष्ठले आफ्नो टिम राम्रो रहेकाले उपाधि जित्ने दावी गरे । उनले शारिरीक रुपमा र अनुभवमा निकै बलियो क्यामरुनी टिम एभिनियरलाई हराएर फाइनल यात्रा तय गरेको स्मरण गराउँदै आफुहरुसँग मनोबल पनि उच्च रहेको बताए । 
शेर्पाका कप्तान विश्वास श्रेष्ठले आफुहरु तीनवटा म्याच जितेर फाइनल सम्म आइपुगेको स्मरण गराउँदै क्यामरुनी टिमलाई हराउँदा टिमका खेलाडीहरु थप उत्साहित रहेको उनले बताए ।