बागमतीका यातायात मन्त्री श्रेष्ठद्वारा आफ्नो कार्ययोजना सार्वजनिक

११ फाल्गुन, हेटौंडा । बागमती प्रदेशका श्रम, रोजगार तथा यातायात मन्त्री एकालाल श्रेष्ठले आफ्ना कार्ययोजना सार्वजनिक गरेका छन् । मन्त्रालयमा आज पत्रकार सम्मेलन गर्दै मन्त्री श्रेष्ठले कार्ययोजनाबारे सार्वजनिक गरेका हुन् ।
उनले श्रम सम्बद्ध समस्याहरु, श्रमिकका मुद्दाहरु, श्रमिकका पेशागत हक अधिकार सुनिश्चित गर्ने, हाल सम्म समेट्न नसकिएका श्रमिकहरुलाई सामाजिक सुरक्षाको दायरामा ल्याउने, प्रदेश सरकारले आवश्यकता अनुसार श्रम कार्यालयहरु स्थापनका लागि अध्ययन गर्ने, हाल प्रदेशको ८ जिल्लाको ३२ स्थानीय तहको सहभागितामा आप्रवासी सुचना केन्द्र संचालनमा रहेकोमा यसलाई विस्तार गरिने, प्रदेश भित्रका १० हजार यूवाहरुलाई सिप विकास तथा व्यवसायिक तालिम प्रदान गरि रोजगारीका अवसरहरु सुनिश्चित गर्ने बताए । उनले  रसुवा, दोलखा, सिन्धुपालचोक र काभ्रेपलान्चोकका सेवाग्राहीलाई केन्दित गरी दोलखा वा सिन्धुपालचोकमा सवारी चालक अनुमतिपत्र र सवारी दर्ता र नियमनसंग सम्बन्धित कार्यक्षेत्र हेर्ने गरी एक कार्यालयको स्थापनको लागि पहल गर्ने, सवारी चालक अनुमतिपत्र प्रदान गर्ने प्रकृयालाई थप सरलीकरण गर्ने ,सहज र प्रविधियुक्त बनाउने लगायतका योजना रहेको जानकारी दिए । 
मन्त्री श्रेष्ठको योजनामा हाल एकान्तकुना ललितपुर बाहेक सबै यातायात व्यवस्था कार्यालयहरु भाडाको भवनमा संचालनमा रहेको र त्यसले संचालन खर्च बढाएको र सेवा संचालनमा कठिनाई भइरहेकोले चालु आव भित्रै जग्गाको व्यवस्थापन गरि कम्तीमा काठमाडौं, हेटौडा र भरतपुरमा कार्यालयको आफनै भवन निर्माणको प्रकृया अगाडी बढाइनेछ ।