विवाद सुल्झाउन बागमती प्रदेशमा विशेष समिति गठन

१४ फागुन, हेटौंडा । बागतमी प्रदेशसभाको अध्यादेशको विद्येयक माथिको विवाद सुल्झाउन विशेष समिति गठन गरिएको छ । प्रदेशसभाको शनिबार साँझ बसेको बैठकले अध्यादेशको प्रतिस्थापन विद्येयकको विवाद सुल्झाउन विद्येयक व्यवस्थापन विशेष समिति गठन गरेको हो । 
प्रदेशसभाको उक्त बैठकले विद्येयक व्यवस्थापन विशेष समिति गठन गरीयोस् भन्ने प्रस्तावलाई सर्वसम्मत रुपमा पास गरेको थियो । दलहरुबीच दुई वटा अध्यादेश प्रतिस्थापन विधेयक पारित गर्ने प्रक्रियाका बारेमा विवाद बढेपछि सभामुख भुवन कुमार पाठकको पहलमा सो समिति गठन गरिएको हो । 
समितिको समय अवधि आगामी फागुन १८ गतेसम्म रहेको छ । उक्त अवधिमा सो समितिले संविद्यानको धारा २०२ अनुसार सरकारले जारी गरेको कर्मचारी सम्बन्धी २ वटा अध्यादेशको प्रतिस्थापन विद्येयकको दफावार  र संशोधन प्रस्ताव छलफल गरी प्रदेशसभा बैठकमा प्रतिवेदन बुझाउनु पर्नेछ । 
समितिमा कांग्रेसबाट कुन्दनराज काफ्ले, छिरिङ दोर्जे लामा, रामकृष्ण चित्रकार, एमालेबाट जयराम थापा, दिनेश चन्द्र देशवकोटा, प्रकाश श्रेष्ठ, माओवादी केन्द्रबाट रत्न प्रसाद ढकाल, राधिका तामाङ, एकीकृत समाजवादी पार्टीबाट बसन्त मान्धर, मधुसुदन पोडेल, हाम्रो नेपाली पार्टीाट शैलेन्द्रमान बज्रचार्य, राप्रपाबाट आशा लामा, उद्धव थापा, नेमकीपाबाट सुरेन्द्रराज गोर्साइ र सृजना सायजु सदस्य रहेका छन् ।
समितिले सदस्यहरु भित्रैबाट संयोजक तोक्ने र स्वयमले कार्यविधी निर्माण गर्न सक्ने अधिकार दिइएको छ । आवश्यकताको आधारमा समितिले विज्ञलाई आमन्त्रण गर्न सक्नेछ । 
गत पुस १८ गते संसदमा पेश भएको प्रदेश निजामती सेवाको गठन, सञ्चालन र सेवाका सर्तहरु सम्बन्धमा व्यवस्था गर्न बनेको अध्यादेश र स्थानीय तहका सेवाको गठन तथा सञ्चालन र सेवाका सर्तहरु सम्बन्धमा व्यवस्था गर्न बनेको अध्यादेशलाई गत माघ ३ गतेको प्रदेशसभा बैठकले स्विकृत गरेको थियो ।