कांग्रेस उपस्थित नभएपछि बागमती प्रदेशसभा बैठक स्थगित

८ चैत, हेटौंडा । विश्वासको मत सम्बन्धी प्रस्तावबारे निर्णय गर्न बोलाइएको बागमती प्रदेशसभा बैठक स्थगित भएको छ । प्रदेशसभा सचिवालयले विशेष कारण बैठक स्थगित भएको जनाएको हो । 
प्रदेशसभा सचिवालयका प्रवक्ता मनोज गुप्ताले विशेष कारण अर्को बैठक चैत १० गते दिउँसो १ बजे बस्ने जानकारी दिए । विश्वासको मत दिने विषयमा नयाँ समिकरणको गठबन्धन दल नेपाली कांग्रेसले संसदीय दलको बैठक रहेको कारण देखाउँदै अनुपस्थित भएपछि बैठक स्थगित भएको हो । कांग्रेसले सरकारमा सहभागिता र संसदीय समितिसहित प्याकेजमा सहमति गर्न खोजेको छ । यसका लागि चैत १० गते विश्वासको मत लिन मुख्यमन्त्री शालिकराम जम्कट्टेललाई कांग्रेसले सुझाव दिएको थियो । काठमाडौंमा बसेको कांग्रेस संसदीय दलको बैठकले विश्वासको मत दिने निर्णय गरेपनि सरकारका बारेमा गठबन्धन दलको सहमति अनुसार अघि बढ्ने निर्णय गरेको छ । 
नेकपा एमालेले अब बस्ने संसद बैठकलाई सम्बोधन गर्दै सरकार छोड्ने र विश्वासको मतको विपक्षमा मतदान गर्ने भएको छ । एमालेले १० र ११ गते आफ्नो पूर्व निर्धारित पार्टी अभियान रहेकाले उपस्थित हुन नसक्ने जनाउँदै १२ गतेका लागि बैठक बोलाउन प्रदेशसभा सचिवालयलाई अनुरोध गरेको छ । 
दलहरूबीच संसद संचालन गर्नेबारे ठोस सहमति नभएपछि मूख्यमन्त्री जम्कट्टेलले चैत १० गते विश्वासको मत लिने व्यहोराको पत्र प्रदेशसभा सचिवालयमा पठाउनु भएको छ । जम्कट्टेलले चैत १३ गतेसम्ममा विश्वासको मत लिनुपर्नेछ ।