हेटौंडा-६ मा जनता स्वास्थ्य कार्यक्रम शुरू, पहिलो दिन ३१२ जनाको परीक्षण

१३ चैत, हेटौंडा । हेटौंडा उपमहानगरपालिका ६ नम्बर वडाको आयोजनामा जनता स्वास्थ्य घरदैलो कार्यक्रम शुरु भएको छ । हेटौंडा उपमहानगरपालिका ६ नम्बर वडाको आर्थिक सहयोगमा हेटौंडा स्वास्थ्य चौकी चौघडाको समन्वयमा जनता स्वास्थ्य घरदैलो कार्यक्रम शुरु गरिएको हो । 
जनता स्वास्थ्य घरदैलो कार्यक्रम अन्तरगत ३० वर्ष माथिका नागरिकको मृगौलाको अवस्था जाँच गरिएको छ । अधिकांश नागरिकहरुमा मृगौला रोगको समस्या आएको कारण वडाले यो कार्यक्रम शुरु गरेको हेटौंडा-६ का वडा अध्यक्ष विष्णु बहादुर दाहालले जानकारी दिए । वडाभित्र रहेका २३ वटा टोल विकास संस्थाहरुलाई विभाजन गरि ८ स्थानमा शिविरको आयोेजना गरिने हेटौंडा स्वास्थ्य चौकी चौघडाका प्रमुख तोयानाथ ढुंगेलले जानकारी दिए । 
शिविरको पहिलो दिन ३१२ जनाले स्वास्थ्य जाँच गराएका छन् । कृष्ण प्रणामी मन्दिर गौरीटार, वंश गोपाल युवा क्लब पुतलीबजार र शान्तिटोलमा रहेको टोल विकास संस्था ६ नम्बर वडा समन्वय समितिको भवनमा जाँच गरिएको थियो । हेटौंडा ६ का वडा अध्यक्ष दाहालले परिक्षणको लागि आवश्यक पर्ने किट हस्तान्तरण गरि शिविरको शुरुवात गरेका हुन् । वडाका जनताहरुको स्वास्थ्य सुरक्षाका लागि आगामी दिनमा पनि यस्ता कार्यक्रमहरुको आयोजना गरिने अध्यक्ष दाहालले बताए । 
३ वटा स्थानमा भएको शिविर कार्यक्रममा हेटौंडा ६ का वडा सदस्य विजय पौडेल, लेखराज ढकाल, टोल विकास संस्था वडा समन्वय समिति हेटौंडा ६ का अध्यक्ष बासुदेव खतिवडा, समन्वय समितिका निवर्तमान अध्यक्ष केशव धिताल, स्वास्थ्य स्वयंसेविका लगायत स्थानीयको उपस्थिति रहेको थियो ।