एकीकृत शिविरबाट राक्सिराङका ६ हजारले सेवा लिए

२३ चैत, राक्सिराङ । मकवानपुरको राक्सिराङ गाउँपालिकाले फागुन २९ गतेबाट चैत २२ गतेसम्म सञ्चालन गरेको एकीकृत घुम्ती शिविरबाट करिब ६ हजार स्थानीयले विभिन्न सेवा प्राप्त गरेका छन । 
पालिकाले वडा कार्यालयको सेवा लिनसमेत तीन घन्टासम्मको पैदल यात्रा गर्नुपर्ने बाध्यतामा रहेका त्यहाँका स्थानीयलाई घरघरमै पुगेर स्थानीय तहले प्रदान गर्ने सेवा प्रदान गरेको थियो । पालिकाले विभिन्न वडाहरू लक्षित गरी गत फागुन २९ गतेदेखि सुरु गरेको अभियान चैत २२ गते बुधबार सम्पन्न गरेको छ। आमनागरिकलाई स्थानीय सरकारले सबै किसिमका सेवाको पहुँच वृद्धि गर्दै सरल र सहज सेवा दिने उद्देश्यले गाउँपालिकाले घरघरमै पुगी घुम्ती शिविरको आयोजना गरेको हो । 
पालिकाले घरघरमै पुगी बिरामी जाँचदेखि योजना अनुगमन र स्थलगत रूपमै भुक्तानीसम्मका सेवा प्रदान गरेको गाउँपालिकाका अध्यक्ष राजकुमार मल्लले जानकारी दिए । अध्यक्ष मल्लले ‘सेवा लिने सबैको अधिकार, घरघरमा स्थानीय सरकार’ भन्ने नाराका साथ अभियान सञ्चालन गरेको बताए। पालिकाको चार स्थानमा भएको छुट्टाछुट्टै शिविरमा करिब दुई हजारजनाले स्वास्थ्य जाँच सेवाका साथ निःशुल्क औषधि प्राप्त गरेका थिए । 
स्वास्थ्य सेवाअन्तर्गत गर्भवती जाँच, भिडियो एक्सरे, क्षयरोगको खकार जाँच, परिवार नियोजनको अस्थायी साधन आयुसिडी र इम्प्लान्ट लगाइएको थियो। आयुर्वेद सेवातर्फ करिब सात सय ५० जनाको जाँच तथा औषधि वितरण गरिएको गाउँपालिकाले जनाएको छ । 
गाउँपालिकाका अध्यक्ष, उपाध्यक्ष, प्रमुख प्रशासकीय अधिकृत, वडाध्यक्षसहित कर्मचारीको टोलीले नै गाउँमा सेवा दिन पुगेको थियो । ज्येष्ठ नागरिक, अशक्त तथा हिँड्न नसक्ने बिरामीहरूको घरघरमै पुगी स्वास्थ्य जाँच र निःशुल्क औषधिको समेत व्यवस्था गरिएको गाउँपालिकाका अध्यक्ष राजकुमार मल्लले बताए  ।