थप ३ वटा प्राविधिक बिषयमा पढाउँदै हेटौंडा सिटी कलेज

२५ चैत, हेटौंडा । हेटौंडा उपमहानगरपालिका वडा नम्बर ५ मा रहेको सिटी कलेजले आगामी शैक्षिक सत्रदेखि सिटिइभिटीको ३ वटा विषय अध्यापन गराउने भएको छ । 
कलेजले शुक्रबार पत्रकार सम्मेलन आयोजना गर्दै सिटिइभिटीको कर्मसियल कुकिङ बेकरी लेभल १, केयर गिभर र मन्टेश्वरी विषयको अध्यापन सुरु गर्न लागेको जानकारी दिएको हो । 
कर्मसियल कुकिङ बेकरी लेभल १ अन्तर्गत ७९२ घण्टाको कक्षा सञ्चालन गरिने कलेजका प्राध्यापक श्रीबहादुर कार्कीले बताए । उनका अनुसार केयर गिभर र मन्टेश्वरी लेभल १ को ३९० घण्टाको कक्षा सञ्चालन हुनेछ । 
जिल्लामा नै पहिलो पटक सो कलेजमार्फत उक्त विषयहरु अध्ययापन गराउने अनुमति पाएको प्राध्यापक कार्कीले बताए । यसअघि यस विषयहरुको अध्ययापन निजी क्षेत्रका संघसंस्था तथा शैक्षिक केन्द्रबाट हुँदै आएको थियो । कलेजले सिटिइभिटीबाट अनुमती प्राप्त गरेलगत्तै उक्त विषयहरु अध्यापनका लागि शिक्षकहरु पनि नियुक्त गरिसकेको छ । 
कलेजले यी विषयहरुका ३०÷३० वटा कोटामा विद्यार्थीहरु राखेर अध्यापन गराउने जानकारी दिइएको छ । कर्मसियल कुकिङ र केयर गिभर अध्ययनका लागि कक्षा ८ उत्तीर्ण गरेको हुनुपर्नेछ भने मन्टेश्वरीका लागि एसएलसी वा एसईई पास गरेको हुनुपर्नेछ । पढाइमा कमजोर र परिस्थितिले अध्ययन गर्न नसकेका व्यक्तिको लागि लक्षित गरी कलेजले उक्त विषय अध्यापन गराउने तयारी गरेको हो । 
साना बालबालिकाको अध्यापन तथा हेरचाह कमजोर रहेकाले त्यसको मध्यनजर गर्दै मन्टेश्वरी ट्रेनिङ र सीप अभावका कारण वेरोजगार वा वैदेशिक रोजगारका समस्या परेका व्यक्तिका लागि सहजता प्रदान गर्ने प्राध्यापक कार्कीले बताए । जिल्लालाई शैक्षिक हवको रुपमा विकास गर्नको लागि क्रियाशिल रहेको यस कलेजमा स्कुल स्तरदेखि स्नातकसम्म अध्यापन गराउँदै आएको छ । 
विद्यालयमा नर्सरीदेखि स्नताकसम्म करिव १ हजार २०० जना विद्यार्थी अध्ययनरत रहेको प्राध्यापक कार्कीले बताए । कार्कीका अनुसार कलेजले माध्यमिक तहतर्फ व्यवस्थापन, विज्ञान र कानून संकाय अध्ययापन गराउँदै आएको छ । कानून विषयका लागि कलेजले यसै शैक्षिक सत्रबाट अध्यापन गराएको उनले बताए । 
स्नातक तहतर्फ व्यवस्थापन र आइटीको पढाई हुँदै आएको छ । २०७० सालबाट कलेजले विएस्सी सिएस आइटी र २०७४ बाट विसिएको अध्यापन गराउँदै आएको छ । जिल्लामा पहिलो पटक विएस्सी सिएस आइटी अध्यापन गराउँदै आएको कलजेले हरेक वर्ष ९० प्रतिशत भन्दा बढी नतिजा ल्याउने गरेको छ ।
विद्यालयले आगामी वर्षमा एचए र ल्याव असिस्टेन्ट विषयको पनि अध्यापन पनि गर्ने लक्ष्य लिएको र आन्तरिक तयारी गरिरहेको प्राध्यापक कार्कीले बताए ।