एमाले अध्यक्ष केपी र रबि एउटै मार्गमाः महासचिव भुसाल

९ बैशाख, हेटौंडा । नेकपा (एकीकृत समाजवादी) का महासचिव घनश्याम भुसालले अराजकताको पछि लागेर मुलुकको विकास र समृद्धि सम्भव नभएको बताएका छन् । 
नेपालमा कम्युनिष्ट पार्टी स्थापनाको ७४ औं दिवसको अवसरमा नेकपा एस जिल्ला कमिटी मकवानपुरको आयोजनामा अगुवा कार्यकर्ता भेलामा उनले केपी ओली र रबि लामिछानेको पार्टी एउटै मार्गको भएको बताए । ‘उपनिर्वाचनको नतिजा के आउला त्यो प्रतिक्षाको विषय हो । 
रवि र केपी एउटै मार्गका हुन् । यो विषयमा धेरै चर्चा गर्नु आवश्यक छैन’, उनले भने, ‘देशको विकासका बाधक केपी ओली हुन् । उनका मानस पुत्रका रुपमा रबि लामिछानेहरुको उदय भएको छ । यिनीहरुबाट मुलुकको विकास र समृद्धि कल्पना गर्नु गलत हुनेछ ।’ 
बाम यात्रामा केपी ओलीको कारण यो अवस्था आएको भन्दै महासचिव भुसालले ओलीसँग कुनै नीति, सिद्धान्त नभएको आरोप लगाए । यहाँ क्रियाशिल राजनीतिक दल र गठबन्धनबाटै मुुलकको स्थायित्व सम्भव भएको उनको भनाई थियो । 
मुलुकको विकासका निम्ति कृषिमा लगानी बढाउनु जरुरी रहेको उनको सुझाव थियो । भुसालले देशको अर्थतन्त्रको विकास गर्दै समाजवादको विस्तार गर्ने पार्टीको लक्ष्य रहेको बताए । 
नेकपा (एकीकृत समाजवादी) मकवानपुर अध्यक्ष विष्णु दाहालको अध्यक्षतामा भएको कार्यक्रममा नेकपा एसका स्थायी कमिटी सदस्य विरोध खतिवडा, ललित बस्नेत, निर्वाचन कमिटी संयोजक माधव पौडेल, केन्द्रीय सदस्य मुनु सिग्देल, सूर्यचन्द्र न्यौपाने, राजाराम स्याङ्तान लगायतले मन्तव्य व्यक्त गरेका थिए ।