एमालेका सचिव रायमाझी र छोरा सन्दीपविरुद्ध पक्राउ पुर्जी

फाइल तस्बिर

२० बैशाख, काठमाडौं । पूर्व ऊर्जामन्त्री एवं नेकपा एमालेका सचिव टोपबहादुर रायमाझी र उनका छोरा सन्दीपविरुद्ध पक्राउ पुर्जी जारी भएको छ । जिल्ला प्रहरी परिसर काठमाडौंले जिल्ला अदालत काठमाडौंबाट बुधवार पक्राउ गर्न पुर्जी लिएको हो । 
नेपालीलाई भुटानी शरणार्थी बनाएर अमेरिका पठाउने काम गर्ने समूह पक्राउ परेपछि उनीहरूले रायमाझी बाबुछोराको नाम पोलेपछि उनीहरुविरुद्ध पक्राउ पुर्जी जारी भएको हो ।
प्रहरीको अनुसन्धानमा भुटानी शरणार्थी बनाएर अमेरिका लैजाने भन्दै ८ जना ७५ नेपालीसँग १० देखि ५० लाख रुपैयाँसम्म उठाईएको देखिएको छ । यो कार्यमा राजनीतिक कनेक्सन रहेको खुलेको छ ।
तत्कालीन गृहमन्त्री रामबहादुर थापाका सुरक्षा सल्लाहकार इन्द्रजित राईसमेत रहेको गिरोहलाई हाल एमाले सचिव रहेका टोपबहादुर रायमाझीले सहयोग गरेको अनुसन्धानमा देखिएको छ ।
यो कार्यमा संलग्न समूहका सदस्यले रायमाझीका छोराका सन्दीपको नाममा काटेको डेढ करोड रुपैयाँको चेक पनि प्रहरीले बरामद गरेको छ। पैसा उठाउने गिरोहमा तत्कालीन गृहमन्त्री थापाका सुरक्षा सल्लाहकार राई, उनका छोरा निरज, केशवप्रसाद दुलाल, सन्देश शर्मा, सानु भण्डारी, अशोक पोखरेल, सागर थुलुङ राई र टंक गुरुङ सक्रिय रहेको जनाइएको छ ।