४ नम्बर वडाको आयोजनामा वृहत उद्यमशीलता प्रदर्शनी हुने

२५ बैशाख, हेटौंडा । हेटौंडामा आगामी जेठ ५ गते बृहत उद्यमशीलता प्रदर्शनी तथा नृत्यु प्रतियोगिता हुने भएको छ ।
हेटौंडाउपमहानगरपालिका वडा नम्बर ४ को आयोजना तथा टोल विकास संस्था नगर समन्वय समितिको व्यवस्थापनमा हुने प्रदर्शनी तथा प्रतियोगिताको बारेमा सोमबार पत्रकार सम्मेलन गरि जानकारी गराइएको हो ।
प्रदर्शनीमा हेटौंडा उपमहानगरपालिकाका १९ वटै वडामा स्थानीय स्तरमा उत्पादित बस्तुको प्रदर्शनी गरिने ४ नम्बर वडा अध्यक्ष नवीन सिग्देलले जानकारी दिए । वडा अध्यक्ष सिग्देलले स्थानीय उत्पादनलाई प्रवर्द्धन गर्ने उदेश्यले नगरभित्रका टोल विकास संस्था, सहकारी, विभिन्न समूह र व्यक्तिले उत्पादन गरेका बस्तुहरुको प्रदर्शनी मार्फत प्रवर्द्धन गरिने बताए । 
उनले प्रदर्शनीमा कुनै शुल्क नलाग्ने बताए । ‘सम्पूर्ण व्यवस्थापन आयोजकले गर्छ । उहाँहरुले आफ्ना उत्पानहरु ल्याएर प्रदर्शन मात्रै गरे पुग्छ ।’उनले प्रदर्शनीमा उत्कृष्ट हुने उत्पादनलाई पुरस्कृत समेत गर्ने बताए । अध्यक्ष सिग्देलले प्रदर्शनीमा सहभागी मध्ये प्रथम, द्वितीय, तृतीय हुनेलाई क्रमशः २५ हजार, १५ हजार, १० हजार र सान्त्वना हुने दुई जनालाई ५÷५ हजार रुपैयाँ पुरस्कार प्रदान गरिने जानकारी दिए ।
अध्यक्ष सिग्देलका अनुसार प्रदर्शनीसँगै सोहि दिन समूहगत नृत्य प्रतियोगिताको हुने छ । प्रतियोगितामा १९ वटै वडाबाट ५ देखि १५ जनासम्म सदस्य भएको समूहले नृत्य प्रतियोगितामा भाग लिन पाउँने छन् ।
गीतसंगीतका माध्यमबाट राष्ट्रियता उजागर गर्ने उद्देश्यले स्वदेशी मौलिक भाषा, सांस्कृतिक र परम्परा झल्किनेगरि नृत्य प्रतियोगिता गर्न लागिएको उनले बताए । उनले प्रतियोगितामा प्रथम, द्वितीय र तृतीय हुनेलाई क्रमशः ५० हजार, ३५ हजार र २० हजार र सान्त्वना हुने दुईवटा समूहलाई १०÷१० हजार रुपैयाँ पुरस्कार प्रदान गरिने जानकारी दिए । 
यस्तै उक्त दिन चर्चित लोकदोहरी गाएक बद्रि पंगेनीको बिशेष प्रस्तुती रहने पनि अध्यक्ष सिग्देलले बताए ।