स्वास्थ्य निर्देशनालयको सुरक्षित गर्भपतनसम्बन्धी अभिमुखिकरण कार्यक्रम

२५ बैशाख, हेटौंडा । स्वास्थ्य निर्देशनालय हेटौंडाको आयोजनामा हेटौंडामा प्रदेश स्तरीय नीति निर्माताहरूसंग सुरक्षित गर्भपतनसम्बन्धी अभिमुखिकरण कार्यक्रम भएको छ ।
बागमती प्रदेशका प्रमुख सचिव मुकुन्द निरौलाको प्रमुख आतिथ्यता एवं निर्देशनालयका निर्देशक महेश्वर श्रेष्ठको अध्यक्षतामा कार्यक्रम भएको हो । 
कार्यक्रममा बोल्दै प्रमुख सचिव निरौलाले छोरा नै चाहिन्छ भन्ने गलत धारणाका कारण असुरक्षित गर्भपतन भइरहेको भन्दै छोराछोरी नभई सन्तान भन्ने धारणा अभिवृद्धि गर्नुपर्ने बताए । उनले नीतिगत सुधार, सचेतना अभिवृद्धि र शैक्षिक पाठ्यक्रममा यसबारे समावेश गर्नुपर्ने बताए । उनले भ्रुण पहिचान गरि गरिने गर्भपतनलाई रोक्न स्वास्थ्यकर्मीहरू लाग्नुपर्ने बताए ।
प्रदेश नीति तथा योजना आयोगका उपाध्यक्ष प्रा. डा. नरबिक्रम थापाले सुरक्षित गर्भपतनसम्बन्धी ज्ञान अभिवृद्धिका लागि पाठ्यक्रममा समावेश गर्नु पर्ने वताउँदै आवश्यकताका आधारमा नीतिगत सुधार गर्नुपर्नेमा जोड दिए । यसलाई आर्थिक, सामाजिक र सांस्कृतिक पक्षसंग जोडेर लैजानुपर्ने बताए ।
कार्यक्रममा बोल्दै प्रदेश लोकसेवा आयोगका सदस्य शर्मिला न्यौपानेले सुरक्षित गर्भपतनसम्बन्धी धारणा विगतको तुलनामा सचेतना अभिवृद्धि भएको बताउँदै सुरक्षित गर्भपतनसम्बन्धी अधिकारबारे प्रचारप्रसार अझ बढाउनु जरुरी रहेको बताईन् ।
हेटौंडा उपमहानगरपालिकाकी प्रमुख मिना लामाले सुरक्षित गर्भपतनसम्बन्धी कानूनलाई कार्यान्वयन गर्न प्रतिवद्ध रहेको बताइन् । उनले जनचेतना अभिबृद्धीका लागि थप काम गर्नुपर्ने बताईन् ।
कार्यक्रममा स्वास्थ्य निर्देशनालयका बरिष्ठ जनस्वास्थ्य प्रशाशक सतिस विष्टले कार्यक्रमबारे प्रकाश पारेका थिए ।