युवा परिषदले खटायो बागमती प्रदेशमा ११९ प्राविधिक

२६ बैशाख, हेटौंडा । बागमती प्रदेश युवा परिषद्को कार्यालयले प्रदेशको विभिन्न स्थानीय तहमा मंगलबारबाट ११९ जना प्राविधिक खटाएको छ ।
सामाजिक विकास मन्त्रालय अन्तर्गतको प्रदेश युवा परिषद्को कार्यालयले ११९ जना प्राविधिक कर्मचारी स्थानीय तहमा खटाएको हो । 
राष्ट्रिय विकास स्वयंसेवक अन्तर्गत ‘प्रदेश स्वयंसेवक बागमती’ का विभिन्न तहका स्वयंसेवकहरुलाई एकदिने अभिमुखीकरण कार्यक्रममा सहभागी गराएर तोकिएको स्थानीय तहमा खटाइएको हो । प्रदेश युवा परिषद्ले सार्वजनिक सूचना प्रकाशन गरेर प्राविधिकका लागि आवेदन माग गरेको थियो । 
एक हजार ५ सय जनाले स्वयम्सेवकको रुपमा काम गर्नका लागि आवेदन दिएकोमा ११९ जना छनौटमा परेका थिए । प्रदेश युवा परिषद्ले स्टाफ नर्स, कृषि तथा भेटिनरी प्राविधिक, ल्याब असिस्टेन्ट, अहेव, अनमी लगायतका प्राविधिक स्वमय्सेवकको माग गरेको थियो । 
अभिमुखीकरण कार्यक्रमको उद्घाटन गर्दै बागमती प्रदेशका सामाजिक विकास मन्त्री कुमारी मुक्तानले यसलाई सेवा गर्ने मौकाको रुपमा बुझ्दै उत्कृष्ट ढंगले काम गर्न आग्रह गरिन् । खटिएका स्थानीय तहमा राम्रो सेवा गरेर जनताको मन जित्न उनले स्वयम्सेवकहरुलाई अनुरोध गरिन् । 
बागमती प्रदेश युवा परिषद्का कार्यकारी उपाध्यक्ष सन्तोष चौलागाईले गुनासो नआउने गरी काम गर्न अनुरोध गरे । ‘युवाहरु प्रति यो समाजले नै धेरै आशा राखेको हुन्छ’, ‘स्थानीय तहमा पुगेर आशाको किरण जगाउने गरी काम गरेर देखाउनुहोला ।’ उनले भने ।
्युवाहरुको लागि यो क्षमता देखाउने यो पहिलो अवसर भएको जानकारी दिँदै उनले सोही अनुसार काम गर्न सुझाव दिए ।