बिपदको प्रमुख कारण डोजरे विकास संस्कृतिः प्रदेश मन्त्री श्रेष्ठ

५ जेठ, हेटौंडा । बागमती प्रदेश सरकारका प्रवक्ता एवम् आन्तरिक मामिला मन्त्री गगानारायण श्रेष्ठले बिपद्को मुख्य कारण डोजरे संस्कृतिको विकास भएको बताएका छन् ।
बिहीबार चितवनको नारायणी किनारमा आयोजना गरिएको जल उद्दार संयुक्त अभ्यास कार्यक्रममा बोल्दै मन्त्री श्रेष्ठले संघ, प्रदेश र स्थानीय तीनै तहको सरकारले  वातावरण मैत्री विकासको बारेमा गम्भीरतापूर्वक सोच्न नसक्दा बिपद्को सामना गर्नुपरेको बताए ।
उनले असिमित आवश्यकताहरुलाई सम्बोधन र समाधान गर्ने क्रममा जथाभावी भौतिक पूर्वाधार निर्माण गरिनु बिपद्को प्रमुख कारण बन्न गएको दावी गरे । मन्त्री श्रेष्ठले जनताको सबैभन्दा नजिक रहेको स्थानीय सरकारका प्रतिनिधिहरुको विकासको संस्कृति निर्माण गर्नेतर्फ ध्यान दिन जरुरी रहेको बताए ।
उनले नीति निर्माणमा भोटको राजनैतिक सोचले काम गर्दा पनि प्रकृतिको विनाश बढ्दै गएको भन्दै यसतर्फ सचेत रहन र वडा स्तरमा बिपद् स्वयमसेवकहरु तयार गरि समुदायस्तरमा बिपद् सम्वन्धी जनचेतना अभियान सन्चालन आवस्यक रहेको मा मन्त्री श्रेष्ठले जोड दिए ।
मन्त्रालयका सचिव ध्रुव गैँडाको अध्यक्षतामा भएको कार्यक्रममा नेपाली सेनाका बाहीनीपति होमनाथ दवाडी, चितवनका प्रमुख जिल्ला अधिकारी सुरेन्द्र पौडेल, बागमती प्रदेश प्रहरीका कार्यालय प्रमुख किरण राणा, सशस्त्र प्रहरी बलका बाहीनीपति लक्षमण बहादुर सिह, मन्त्रालयका उपसचिव दिपक न्यौपानेलगायतको आतिथ्यता रहेको थियो ।