प्रहरीलाई आचरण व्यवहार सुधार्न डिआईजी राणाको निर्देशन

९ जेठ, हेटौंडा । बागमती प्रदेश प्रहरी प्रमुख प्रहरी नायव महानिरीक्षक (डिआईजी) किरण राणाले मातहतका कार्यालय प्रमुखहरूलाई निर्देशन दिएकी छिन् ।
डिआईजी राणाले भर्चुअल माध्यममार्फत पूर्ण व्यवसायिक रूपमा संगठनले अंगिकार गरेको शुन्य सहनशिलताको नीति अनुरुप कार्य सम्पादन गर्न र तस्करी नियन्त्रणमा निर्मम तरिकाले प्रस्तुत हुन निर्देशन दिईन् । उनले प्रहरी आचरण व्यवहार सुधार गर्ने, प्राकृतिक स्रोत साधनको अवैध दोहन नियन्त्रण गर्ने, फरार अपराधी पक्राउ गर्ने र व्यवस्थित ट्राफिक व्यवस्थापन गर्नेतर्फ लाग्न निर्देशन दिईन् ।
प्रमुख राणाले कुनै पनि गुनासो नआउने ढंगले आम नागरिकलाई प्रभावकारी सेवा प्रवाह गरी बागमती प्रदेशभरको शान्ति सु-व्यवस्था कायम गर्न र अपराध नियन्त्रणमा प्रभावकारी रूपमा परिचालित हुन निर्देशन दिईन् ।
कार्यक्रममा प्रदेश प्रहरी प्रवक्ता प्रहरी वरिष्ठ उपरीक्षक दिपक रेग्मीले बागमती प्रदेश अन्तर्गतका प्रहरी ईकाईहरूबाट २०८० साल वैशाख महिनामा सम्पादित कार्यहरू सहितको निर्देशनात्मक प्रस्तुति दिएका थिए । सो अवसरमा प्रदेशका जिल्ला प्रहरी प्रमुख तथा नेपाल प्रहरी राजमार्ग सुरक्षा तथा ट्राफिक व्यवस्थापन कार्यालयका प्रमुखले सम्पादित कार्यको प्रस्तुतिकरण गरेका थिए ।