सामुदायिक वन उपभोक्ता महासंघको स्थापना दिवसमा हेटौंडामा गोष्ठी

१८ जेठ, काठमाडौं । सामुदायिक वन उपभोक्ता महासंघको २८ औं स्थापना दिवसको अवसरमा बिहीबार हेटौंडामा गोष्ठीको आयोजना गरिएको छ । सामुदायिक वन उपभोक्ता महासंघ मकवानपुरको आयोजनामा सामुदायिक वन समूहको दिगो व्यवस्थापन तथा आगामी कार्यदिशा विषयक गोष्ठी गरिएको हो ।
महासंघ मकवानपुरका अध्यक्ष साधुराम चौलागाईंको सभाध्यक्षतामा भएको कार्यक्रममा महासंघका केन्द्रीय सदस्यहरू रामेश्वर बोहरा, नारायणप्रसाद नेपाल, रामहरी चौलागाईं, बागमती प्रदेश अध्यक्ष विनोद सापकोटा, राप्ती वन डिभिजन कार्यालयका वन अधिकृत बच्चुराम सुवेदी, महासंघ जिल्ला उपाध्यक्ष  ठूलीमाया मोक्तान लगायतले मन्तव्य व्यक्त गरेका थिए ।
कार्यक्रममा सहभागीहरूले राज्यबाट विभिन्न समयमा हचुवाको भरमा ल्याइने नीतिले वन व्यवस्थापनमा समस्या परेको बताउँदै दिगो वन व्यवस्थापनका लागि स्पष्ट नीति आवश्यक रहेको छ । उनीहरूले यसका लागि राज्यसंग सहकार्य गरि सामुदायिक वन व्यवस्थापनमा देखिएका समस्या समाधानका लागि पहल गरिनुपर्ने बताए । राज्यले सामुदायिक वनमाथि तेहेरो कर तिर्नु परिरहेकाले यसलाई एकद्वार प्रणालीमा लैजानुपर्ने बताएका थिए ।
कार्यक्रममा स्थानीय वन महासंघका प्रतिनिधि, जिल्ला महासंघका प्रतिनिधि र सामुदायिक वन समूहका प्रतिनिधिहरूको सहभागिता रहेको थियो ।