बागमतीको बजेटः समाजवाद उन्मुख अर्थतन्त्रको जग मजबुद बनाउने

१ असार, हेटौंडा । बागमती प्रदेश सरकारको बजेटले समाजवाद उन्मुख अर्थतन्त्रको जग मजबुद बनाउने उद्धेश्य राखेको छ ।
प्रदेशसभा बैठकमा शुक्रबार बजेट प्रस्तुत गर्दै प्रदेशका आर्थिक मामिला तथा योजना मन्त्री बहादुरसिं लामाले यस्तो उद्देश्य राखेको जनाएका हुन् । बजेटले दिगो आर्थिक बृद्धि हासिल गर्ने, सरकारी खर्चमा मितव्ययिता अपनाउने र आर्थिक अनुशासन कायम गर्ने उद्धेश्य लिएको छ ।
बजेटले प्रदेशको सवलीकरण र सार्वजनिक सेवामा सुधार, भौतिक पूर्वाधार र सामाजिक क्षेत्रमा विकास, कृषि क्षेत्रको रुपान्तरण र वन क्षेत्रको व्यवसायिकरणलाई प्राथमिकतामा राखेको छ । त्यस्तै, पर्यटन प्रवद्र्धन, औद्योगिक विकास र नीजि क्षेत्र प्रवद्र्धन, वातावरण संरक्षण र विपद व्यवस्थापन जस्ता क्षेत्रलाई बजेटले प्राथमिकतामा राखेको छ ।
प्रदेश सरकारले खर्चमा मितव्ययिता कायम गर्न प्रशासनिक भवनबाहेक अन्य भवन नबनाउने, अतिरिक्त, प्रोत्साहन र विशेष भत्ता खारेज गर्ने, सवारी साधन खरिद नगर्ने, प्रदेश खेलकुद परिषद र युवा परिसदलाई एकिकृत गरी प्रदेश युवा तथा खेलकुद परिषद एकिकृत गर्ने जस्ता कार्यलाई अघि बढाउने भएको छ ।
पूँजिगत खर्च बढाउन पहिलो त्रैमासिकमा ठेक्का व्यवस्थापनको काम शुरु गर्ने सक्ने र दोस्रो त्रैमासिकसम्म ठेक्का नलागेका योजनाको बजेट समर्पण गर्नुपर्ने प्रक्रिया अघि बढाउने भएको छ ।