बागमती प्रदेशको बजेटप्रति प्रतिपक्षीको असन्तुष्टि, संसद अवरुद्ध

१२ असार, हेटौंडा । बागमती प्रदेश सरकारले ल्याएको बजेटप्रति प्रतिपक्षी दलले असन्तुष्टि व्यक्त गरेका छन् ।
प्रमुख प्रतिपक्षी दल नेकपा एमाले र प्रतिपक्षी दल राप्रपाले बजेटप्रति असन्तुष्टि व्यक्त गरेका हुन् । उनीहरूले प्रदेशसभा बैठक शुरू हुने वितिकै उठेर बैठक अवरुद्ध गरेका छन् । अवरोधका बीच आर्थिक मामिला तथा योजना मन्त्री बहादुरसिं लामाले बजेटमाथि छलफल गरियोस् भन्ने प्रस्ताव पेश गरेका थिए । 
बैठकमा बोल्दै प्रमुख प्रतिपक्षी दल नेकपा एमालेका नेता जगन्नाथ थपलियाले बजेट असन्तुलित, दिगो विकासको मर्म विपरित र गरिबको पक्षमा नभएको बताए । उनले बजेट संघीय प्रणालीमा प्रहार गर्ने खालको रहेको बताए । बजेट मूख्यमन्त्री र मन्त्रीहरू रहेको सिन्धुपाल्चोक, धादिङ र नुवाकोट गरि ३ जिल्लाका ३ निर्वाचन क्षेत्रमा कुल बजेटको २१ प्रतिशत बजेट विनियोजन भएको उनको भनाई छ । नेताका नीजि जग्गा र प्लटिङ सुधारका लागि तारजालीसहित तटबन्धमा बजेट राखिएको उनको दावी छ । सामाजिक विकास मन्त्रालयको बजेटमा गैरसरकारी संस्थाको नामै तोकेर बजेट विनियोजन भएको उनको भनाई छ । उनले बजेट पुनर्लेखन गरेर समावेशी बनाउन सुझाव दिए ।
उनीहरूको अवरोधका कारण सभामुख भुवन पाठकले बैठक ५:४५ बजेसम्मका लागि स्थगित गरेका छन् । यसअघि बसेको पहिलो बैठकमा विभिन्न संसदीय समितिमा सदस्यहरू मनोनित गरिएको थियो ।