तटबन्धले बस्ति र खेतियोग्य जमिन सुरक्षित

१५ भदौ, हेटौँडा । सामुदायिक वन उपभोक्ता महासंघ (फेकोफन)को संयोजनमा मनहरी–३ विजौनामा गरिएको तटबन्धले यहाँको बस्ति र खेतियोग्य जमिन सुरक्षित भएको छ । फेकोफनको संयोजनमा मनहरीमा भईरहेको हरियो वन कार्यक्रमको बुधबार गरिएको अनुगमनमा स्थानीयले तटबन्धपछि आफ्नो बस्ति र खोतियोग्य जमिन सुरक्षित भएको बताएका हुन् ।
विजौनामा रहेको पशुपति सामुदायिक वन उपभोक्ता समूहले बस्ति र खेतियोग्य जमिन सुरक्षाका लागि गरेको तटबन्धको सरोकारवालाहरुले अनुगमन गरेका थिए । अनुगमनका क्रममा वन समूहले कत्ले र हाङ्गाला खोल्सीमा गरेको तारजालिसहितको तटबन्धका कारण मनहरी–३ विजौनाको करिव एक सय विगाह खेतियोग्य जमिन सुरक्षित भएको जानकारी दिईएको थियो । दुईवटा खोल्सीमा गरी १ सय २९ मिटर लामो तटबन्ध भएको छ । ‘तटबन्ध पछि एक सय विगाह खेतियोग्य जमिन र करिव एक सय ५० घरधुरी सुरक्षित भएको छ ।’–समूहका अध्यक्ष रघुनाथ रुम्बाले भने । रुम्बाका अनुसार दुई खोल्सीमा बर्षेनी बाढि आउँदा मनहरी वडा नम्बर ३, ५ र ६ का खेतिबाली नष्ट हुने र घरबार छोडेर भाग्नुपर्ने अवस्था थियो । अनुगमनमा सहभागीाहरुलाई स्थानीयले तटबन्धका कारण खेत र बस्ति जोगिएको भन्दै यसलाई थप मजबुद बनाउन पहल गर्नुपर्ने सुझाव दिएका थिए । उनीहरुले तटबन्ध आसपास बृक्षरोपण गर्न आग्रह गरेका छन् ।
सधैं बाढिका कारण खेतियोग्य जमिन र बस्ति नै जोखिममा पर्ने देखेपछि ५ लाख रुपैँया समूहलाई तटबन्धका लागि उपलव्ध गराईएको फेकोफन मकवानपुरकी अध्यक्ष पञ्चमाया स्यांतानले बताईन् । केयर नेपालको आर्थिक सहयोग रहेको कार्यक्रम प्रभावकारी भएको अनुगमनका सहभागीहरुले बताएका थिए । उनीहरुले तल्लो क्षेत्रमा तटबन्धको काम गुणस्तरीय भएको भन्दै बाढि पहिरो नियन्त्रणका लागि माथिल्लो क्षेत्रमा पनि काम गर्नुपर्ने सुझाव दिएका थिए । उनीहरुले माथिल्लो क्षेत्रमा हुने खोरिया खेति नियन्त्रणका लागि केयर नेपाल र फेकोफनको ध्यानाकर्षण गराएका थिए । कार्यक्रममा केयर नेपाल, फेकोफन, वन, जिविस, बनस्पति, भूसंरक्षण, पशु, कृषि, महिला बालबालिका कार्यालय, हिमवन्ति नेपाल,संचारकर्मी लगायतको सहभागिता रहेको थियो ।