हेटौँडा बजारको सडक विस्तार गर्न उपमहानगरको सर्वसम्मत निर्णय

prastakhabar file photo

१६ असार, हेटौँडा ।  हेटौँडामा विगत ६ बर्ष देखि चर्चामा रहेको २५ मिटर सडक विस्तार अभियानमा उपमहानगरको  सर्वसम्मत निर्णयसँगै सडक विस्तार कार्यमा स्थानीय सरकारको साथ रहने देखिएको छ । हेटौँडा उपमहानगरपालिकाले सडक विस्तार कार्यमा सर्वसम्मत निर्णय गरेको छ । उपमहानगरपालिकाको शनिबार सम्पन्न १३ औं नगरसभाको दोस्रो वैठकले सडक विस्तार कार्य गर्न सर्वसम्मत निर्णय गरेको हो ।आज बसेको १३ औँ नगरसभाको दोस्रो वैठकमा सहभागी भएका १९ वडाका  सम्पूर्ण जनप्रतिनिधिले उठेर तालि बजाएर सर्वसम्मतरुपमा सडक विस्तार गर्ने निर्णय गरेको उपमहानगरका प्रवक्त हेटौँडा–१ का वडाध्यक्ष सविन न्यौपानेले बताएका छन् । उनले सडक विस्तार पछि उत्पन्न हुने समस्या र व्यवसायीहरुको व्यवस्थापन, क्षतिपूर्तिका लागि उपमहानगरले सम्बन्धीत निकायलाई पहल र समन्वय गर्ने प्रवक्ता न्यौपानेले जनाएका छन् । 
यता डिभिजन सडक कार्यालयले हेटौंडाले असार १० गते हेटौँडा बजार क्षेत्रमा सडकको २५ मिटर भित्र पर्ने घरटहार र संरचना हटाउन ३५ दिने सूचना राष्ट्रिय दैनिक पत्रिकामा प्रकाशित गरेको थियो । २०७४ सालमा सुरु भएको अभियान अदालतको स्टे अर्डरमा रोकिएको थियो । यता सडक विस्तार अभियान राजनैतिक दलहरुको मतको मसला बन्दै आएको छ ।  सडक विस्तार अभियानका फरक फरक तर्क आउने गरेको छ ।