बागमतीमा सदन संचलन गर्न एमालेको माग

२९ साउन, हेटौंडा । बागमती प्रदेशको प्रमुख प्रतिपक्ष दल नेकपा एमालेले सदन संचालन गर्न माग गरेको छ । एमाले बागमती प्रदेशसभा संसदीय दलले आइतबार पत्रकार सम्मेलन गर्दै प्रदेशसभा बैठक संचालन गर्न माग गरेको हो ।
नागरिकका समस्याको बिषयमा छलफल हुुनुपर्ने सदन लामो सयमसम्म रोक्नु नहुँने भन्दै एमालेले सदन संचालनको माग गरेको हो । एमाले बागमती प्रदेश संसदीय दलका नेता जगन्नाथ थपलियाले बजेट पास गरेको महिनौ बित्दासमेत प्रदेशसभा बैठक आह्वान नगरेर सरकारले सदनलाई सदन र सांसदहरुलाई बन्दि जस्तै बनाएको आरोप लगाए । उनले बढ्दो महंगी, विपद् र रोगको संक्रमणबाट नागरिकहरु समस्यामा परेपनि सरकार वेखबर भएको दावी गरे ।
उनले तत्काल सदन संचालन गरेर नागरिकका समस्याको बिषयमा छलफल चलाउँनुपर्ने बताए । ‘नागरिकहरु रोग र भोकसँग मात्र हैन विपद्सँग पनि लडिरहेका छन् । बाढी पहिरोले जताततै क्षति पु¥याइरहेको छ । चामल, दाल जस्ता दैनिक उपभोग्यवस्तुहरुको महंगी बढेर नागरिकहरु तड्पिरहेका छन् ।’ उनले भने, ‘यस्तो अवस्थामा पनि सरकार कहाँ छ ? भनेर खोज्दै हिड्नु परेको छ । 
नेता थपलियाले सांसदहरु नागरिकको आवाज उठाउन चाहेपनि सरकारले प्रदेशसभा बैठक बस्ने व्यवस्था मिलाउन नसकेको आरोप लगाए । उनले सरकार नागरिकका समस्यामा भन्दा पनि मन्त्रालय भागबण्डामा केन्द्रित भइरहेको दावी गरे ।