पहिरोमा परि मृत्यु भएका परिवारलाई भेटे मन्त्री श्रेष्ठले

२९ साउन, हेटौंडा । सिन्धुलीको हरिहरपुरगढी गाउँपालिका वडा नम्बर १ ककरेका पहिरो प्रभावित परिवारलाई सरकारले ७ लाख रुपैयाँ उपलब्ध गराउने भएको छ ।
पहिरो प्रभावित परिवारलाई आइतबार भेटी बागमती प्रदेश सरकारका आन्तरिक मामिला तथा कानूनमन्त्री गंगानारायण श्रेष्ठले केही दिनभित्र बागमती प्रदेश सरकारको तर्फबाट २ लाख र नेपाल सरकारको तर्फबाट ५ लाख गरी ७ लाख रुपैयाँ उपलब्ध गराउने प्रतिवद्दता व्यक्त गरेका छन् ।
यही साउन २३ गते बिहान् मकवानपुरको बागमती गाउँपालिका वडा नम्बर ५ सिक्रे दोभानको पहिरोमा अक्कल बहादुर स्याङतानसहित चारजनाको मृत्यु भएको थियो भने दुईजना अझै बेपत्ता रहेका छन् । 
पहिरोमा परी घरधनी अक्कलबहादुर सहित उनकी श्रीमती शान्तिमाया स्याङ्तान, छोरी शिला पहरी र नातिनी दिव्या पहरीको मृत्यु भएको छ । अक्कलबहादुरका ज्वाई जीवन पहरी र नाति मलिन पहरी अझै बेपत्ता छन् ।
घटनमा परी बागमतीले बगाएका सिन्धुलीको हरिहरपुर गाउँपालिका वडा नम्बर १ का पासाङ घिसिङको भने जीवितै उद्धार गरिएको थियो । उनको उपचार भइरहेको छ । 
मन्त्री श्रेष्ठले पहिरो प्रभावित परिवारलाई भेटी मृतकप्रति श्रद्धाञ्जली र परिवारजनमा समवेदना व्यक्त गरेका थिए । उनले मृतकको किरिया खर्चका लागी व्यक्तिगत तर्फ १० हजार रुपैयाँ सहयोग समेत गरेका छन् । यस्तै नेपाल रेडक्रस सोसाइटी सिन्धुली र उद्योग बाणिज्य संघ सिन्धुलीको तर्फबाट पनि ४४ हजार बराबरको खाद्यन्न र अन्य सामाग्री सहयोग गरिएको छ ।