लघुकथा चौतारीद्वारा सुन्ने सुनाउने कार्यक्रमको आयोजना 

६ भदौ, हेटौंडा । लघुकथा दिवसको सन्दर्भमा लघुकथा चौतारी मकवानपुरले मंगलबार हेटौँडा उपमहानगरपालिका वडा नम्बर ४ चिल्ड्रेनपार्कमा रहेको नेपाल जर्नी लाइब्रेरीमा लघुकथा वाचन कार्यक्रमको आयोजना गरेको छ ।
चौतारीका संयोजक किशन पौडेलको सभाध्यक्षमा भएको लघुकथा सुन्ने सुनाउने अभियानको चौथो शृंखलामा मातृभुमी साहित्य समाज हेटौडाका अध्यक्ष माधव पोखरेलको प्रमुख आतित्थ्यता रहेको थियो ।
लघुकथा उन्नयन र सामाजीक चेतना अभिवृद्धिका लागि लघुकथा चौतारी मकवानपुरले सुरु गरेको अभियानका क्रममा लघु कथाकार मुना अर्याल र गणेश श्रेष्ठलाई सम्मान समेत गरिएको छ ।
लघुकथा चौतारीका सचिव श्यामप्रसाद श्रेष्ठले सहजीकरण गरेको कार्यक्रममा चौतारीका उपाध्यक्ष बिष्णु प्रसाद गौतम, झरना साहित्यिक परिवारका संस्थापक अध्यक्ष एवं नियात्राकार रमेशमोहन अधिकारी र किशन पौडेलले लघुकथाको बारेमा प्रकाश पारेका थिए ।
कार्यक्रममा मुक्तक मञ्च मकवानपुरका अध्यक्ष डी.बी. बर्तौला, लघुकथाकार अनन्तराज उपाध्याय, साहित्यकार राम कुमार बिस्ट ‘बिस्ट अङ्कल’, राजनीतिकर्मी बद्री लम्साल, नाटक एवम् लघुकथा सर्जक समीर पाख्रिन, मुक्तक सर्जक सुवास सजल, मिथिला अधिकारी, भोला फुयाँललगायत सृजनशील बाल समूहका सदस्यहरूको उपस्थिति रहेको थियो ।