मुख्यमन्त्री जम्कट्टेल सहितको टोलीद्धारा चित्रेपानी वनमा वृक्षारोपण

२ असोज, हेटौडा । बागमती प्रदेश मुख्यमन्त्री शालिकराम जम्कट्टेल सहितको टोलीले हेटौडा–६ मा रहेको चित्रेपानी सामुदायिक वनमा वृक्षारोपण गरेका छन् । संविधान दिवस मुल आयोजक समिति बागमती प्रदेशले आयोजना गरेको वृक्षारोपण कार्यक्रममा मुख्यमन्त्री जम्कट्टेलले विभिन्न प्रजातिका विरुवा रोपेका हुन् । वृक्षारोपण पछिको कार्यक्रमलाई सम्बोधन गर्दै मुख्यमन्त्री जम्कट्टेलले बागमती प्रदेश समृद्धिको बाटोमा अगाडी बढेको बताए ।

१२ वर्षे जनयुद्ध र जन आन्दोलनले ल्याएको परिवर्तनलाई आत्मसाथ गर्दै संविधान रक्षा गर्नु सबै दल जिम्मेवार रहनुपर्ने कुरामा जोड दिएका छन् । कार्यक्रममा सामाजिक विकास मन्त्री कुमारी मुक्तान, प्रदेशसभा सदस्य एकालाल श्रेष्ठ, प्रेम बहादुर पुलामी, जिल्ला समन्वय समिति प्रमुख ललित घलान, प्रमुख जिल्ला अधिकारी सूर्य सेढाई, हेटौडा–६ का वडा अध्यक्ष विष्णु बहादुर दाहाल, सव डिभिजन वन कार्यालय, हेटौडाका प्रमुख रामचन्द्र श्रेष्ठ, चित्रेपानी सामुदायिक वनका अध्यक्ष सूर्य बहादुर घलान, शिखरपानी सामुदायिक वनका अध्यक्ष चन्द्र बहादुर पाख्रिन, सामुदायिक वनका पदाधिकारी, उपभोक्ता लगायतको सहभागिता थियो । कार्यक्रम मार्फत अमला, अम्बा, सतसिाल, टटेलो, निम, कागती, हर्रो, बर्रो, सरिफा, काइयो फूल,बेल, मेङगोट्रिन लगायतका विरुवाको वृक्षारोपण गरिएको थियो ।