हेटौंडा अस्पताललाई प्रतिष्ठानबाट अलग गर्नुपर्छः महत

१५ असोज, हेटौंडा । बागमती प्रदेशको राजधानी हेटौंडामा रहेको एकमात्र सरकारी अस्पताल हेटौंडा अस्पताललाई मदन भण्डारी स्वास्थ्य विज्ञान प्रतिष्ठानबाट अलग गर्नुपर्ने मागसहित संयुक्त अभियान मकवानपुरले प्रदेशका सांसदहरुलाई ध्यानकर्षणपत्र बुझाएका छन् ।
मकवानपुरमा रहेका नेपाली कांग्रेस, नेकपा माओवादी केन्द्र र नेकपा (एकीकृत समाजवादी) को संयुक्त जिल्ला स्तरीय समितिले हेटौँडा अस्पताललाई मदन भण्डारी विज्ञान प्रतिष्ठानबाट अलग गर्नुपर्ने माग अघि सारेको थियो । 
आइतबार प्रदेशका सांसद तथा मन्त्रीलाई भेटेर मदन भण्डारी स्वास्थ्य विज्ञान प्रतिष्ठानलाई स्वास्थ्य क्षेत्रको दक्ष जनशक्ति उत्पादन गर्ने तथा उच्चस्तरको सबै स्वास्थ्य सेवा उपलब्ध गराउने संस्थाको रुपमा विकास गर्न र हेटौंडा अस्पताललाई प्रतिष्ठानबाट छुट्याई नेपाल सरकारकै मातहतमा राखी स्वास्थ्य सेवा प्रदान गराउन समस्या देखिएको हालको ऐनमा संशोधन वा विस्थापन गर्नको ध्यानकर्षण पत्र बुझाएको कांग्रेस मकवानपुरका सचिव भीमसेन महतले बताए । 
कांग्रेसका सचिव महत संयोजक रहेको जिल्लास्तरीय समितिमा माओवादी केन्द्रका सचिव भीम पाख्रिन, एकीकृत समाजवादीका सचिव ध्रुव भुजेल र विज्ञ सदस्यको रुपमा हेटौंडा अस्पतालका निवर्तमान अध्यक्ष प्रकाश पौडेल रहेका छन् । यो समितिले मदन भण्डारी स्वास्थ्य विज्ञान प्रतिष्ठानबाट हेटौंडा अस्पतालबाट अलग गर्नुपर्ने माग गर्दै आएको छ ।