भूकम्प पीडितलाई प्रधानमन्त्रीको नयाँ प्याकेज

२३ भदौ, काठमाडौं । प्रधानमन्त्री पुष्पकमल दाहालले भूकम्प पीडितका लागि नयाँ प्याकेजको घोषणा गरेका छन् । आफु प्रधानमन्त्री भएपछि ५ लाखको प्याकेज घोषणा गरेका प्रधानमन्त्री दाहालले  विहीबार ८ लाखको प्याकेज घोषणा गरेका हुन् ।

प्रधानमन्त्री भएपछि पहिलो पटक संसदमा बोल्दै दाहालले भूकम्प पीडितलाई घर निर्माणका लागि दिने भनिएको २ लाख अनुदान बढाएर तीन लाख  दिने घोषणा गरेका छन् । त्यसैगरी, सामूहिक जमानीमा ३ लाख निर्व्याजी ऋण दिइने बताए । भूकम्पका कारण पेशा र रोजगारीसमेत गुमाएकालाई स्वरोजगारमुलक व्यवसाय गर्न परियोजना धितोमा सहुलियत व्याजदरमा २ लाखसम्म ऋण दिइने दाहालको भनाई छ । अनुदान रकम ३ लाख, जमानिमा सहुलियत ऋण ३ लाख र परियोजना धितोमा ऋण २ लाख गरी ८ लाख को प्याकेज प्रधानमन्त्रीले सार्वजनिक गरेका छन् ।

उनले सरकारले घोषणा गरेको नीजि घर पुर्ननिर्माणको पहिलो किस्ता ४५ दिनभित्र पुर्याउन पुनः निर्देशन दिंदै नियमित अनुगमन हुने दावि गरे । आफू प्रधानमन्त्री हुनु अघि झण्डै ४० हजारले मात्र पाएकोमा अहिले ३ लाख १९ हजार पुगेको उनको भनाई छ । उनले ५ लाखलाई मध्यकालिन र अल्पकालिन अवधिका निःशुल्क सिपमुलक तालिम दिने घोषणा गरे ।

संविधान कार्यान्वयन पहिलो प्राथमिकता

प्रधानमन्त्री पुष्पकमल दाहालले सरकारको प्रमुख प्राथमिकता संविधान कार्यान्वयन रहेको जनाए । उनले संविधान कार्यान्वयन पहिलो प्राथमिकता रहेको जनाउँदै आन्दोलनरत पक्षसँग असमझदारीको दुरी घटेर समझदारी बढेको बताए । उनले सबै पक्षसँग उदार भएर सहमित खोज्न ढिला गर्न नहुने बताए । उनले असोज मसान्तसम्म स्थानीय निकायको पुर्नसंरचना आयोगको काम पूरा हुने बताए । उनले ०७४ माघ ७ सम्म तीनवटै निर्वाचन गर्न  सरकार लागि परेको बताए । त्यसका लागि निर्वाचन सम्बन्धी कानुन बनिरहेको बताए ।