मनहरीमा स्त्री रोग सम्बन्धि निशुल्क स्वास्थ्य शिविर

२९माघ,हेटौंडा। मकवानपुरको मनहरी गाउँपालिकाले  विशेषज्ञ चिकित्सक सहितको स्त्री रोग सम्बन्धी स्वास्थ्य शिविर सञ्चालन गरेको  छ। 

गाउँपालिकाले विभिन्न वडामा २८ र २९  गते सम्म चालु आर्थिक वर्ष २०८०/८१ को नीति तथा कार्यक्रममै महिलाहरुका लागि यौन तथा प्रजनन् स्वास्थ्य शिविर कार्यक्रम समावेस गरी स्वास्थ्य शिविर सञ्चालन गरीएको गाउँपालिकाका स्वास्थ्य शाखा प्रमुख रामचन्द्र दाहालले बताएका छन् ।  

मनहरी गाउँपालिकाको आयोजनामा र  नेपाल परिवार नियोजन संघ मकवानपुरले प्राविधिक सहयोगमा शिविर सञ्चालन गरिएको हो । शिविरको पहिलो दिन माघ २८ गते आइतबार मनहरी गाउँपालिका वडा नं १ मा शिविर सञ्चालन भएको थियो । उक्त शिविरमा १ सय ३१ जना महिलाहरुले सेवा लिएका थिए ।सोमबार वडा नम्बर ३ मा शिविर सञ्चालन भएको थियो । हाँडिखोला स्वास्थ्य चौकिमा आयोजीत उक्त शिविरमा १ सय ४७ जना महिलाहरुले सेवा लिएका छन् । 
गाउँपालिका अध्यक्ष रन्जन कालाखेतीले स्वास्थ्य जस्तो संवेदनशील विषयमा आफुले पहिलो प्राथमिकता दिएर अघि बढेको बताएका छन् । विपन्न नागरीकलाई निशुल्क स्वास्थ्य विमा सँगै अति जटिल रोगीहरुलाई उपचारका लागि गाउँपालिकाले सहयोग गर्दै आएको उहाँको भनाई छ ।