देउवा र ओली सुटुक्क बाहिर

२३ भदौ, काठमाण्डौं । सर्वसाधारणले सत्तापक्ष र प्रतिपक्ष दलका नेताबीच सधैं जुवारी परेको सुन्ने गरेका छन् । उनीहरु सँगसँगै नारिएर हिडेको विरलै देख्छन् । विहिबार संसद भवनमा सत्तापक्ष र विपक्ष दलका दुई शिर्ष नेता नारिएर हिडेको देखियो ।

संसद चलिरहँदा काँग्रेस सभापति शेरबहादुर देउवा र एमाले अध्यक्ष केपि शर्मा ओली एकसाथ सुटुक्क संसदबाट बाहिरिए । प्रधानमन्त्री पुष्पकमल दाहालले लामो संसद सम्बोधन सके लगतै सत्तापक्षिय नेता देउवा र प्रमुख प्रतिपक्षिय नेता ओलीसँगै संसदबाट बाहिरिएका हुन् । दाहालले सम्बोधन सकेर रोष्टमबाट तल झरेपछि ओलीसँग हात मिलाएर आफ्नो कुर्सीमा बसे । त्यस लगतै सभामुखले भौतिक योजना तथा यातायात व्यवस्था मन्त्री रमेश लेखकलाई विद्ययेक पेश गर्नका लागि रोष्टममा बोलाईन् । उनले विद्ययेक पेश गरिरहदा देउवा कुर्सीबाट उठेर बाहिरिन अघि बढे । केही अघि बढिसकेका देउवा पुनः फर्किएर ओली बसिरहेको कुर्सी अघि पुगेर उभिए ।

ओली उठेर हात मिलाए, त्यसपछि देउवाले बाहिर जाउँ भन्ने संकेत गरेपछि ओली कुर्सीबाट बाहिर निस्किए । दुबै सँगै गफिदैं संसद भवनको ढोकाबाट बाहिरिए । दुई नेता गफिदै बाहिरिएको दृष्य व्यवस्थापिका संसदको क्यामाराले कैद गरेको थियो । दुबैबीच के छलफल भयो त्यो भने खुलेन । दुई पूर्वप्रधानमन्त्री बाहिरिरहँदा सभामुख ओनसरी घर्तिले संसद बैठक शुक्रबारसम्मका लागि स्थगित गरेको सुनाईन् ।