हेटौंडाका मेयर, प्रजिअ, प्रहरी प्रमुखले सफा गरे फरेष्ट्रिको झाडी

झाडी सफा गर्दै मेयर, प्रजिअ सहितको टोली

२ कार्तिक, हेटौंडा। त्रिभुवन राजपथसंगै जोडिएको सडक र  हेटौंडा-१० मा रहेको वनविज्ञान अध्ययन संस्थान (फरेष्ट्रि) आसपासको क्षेत्रमा  सरसफाइ गरिएको छ।

बिहीबार हेटौंडा उपमहानगरपालिका मेयर मिना कुमारी लामा, मकवानपुरका प्रजिअ तिर्थराज चिलुवाल, जिल्ला प्रहरी कार्यालय मकवानपुरका प्रहरी प्रमुख एसपी विश्व खड्का तथा सशस्त्र प्रहरी बल १४ नम्बर गणका प्रमुख एसपी ज्ञान प्रसाद भुर्तेल, नेपाली सेनाका पधाधिकारीहरु, १० नम्बर वडाध्यक्ष फुर्वा लामा, सामुदायिक प्रहरी उपसेवा केन्द्र बसपार्कका अध्यक्ष प्रदिप कडेललगायत स्थानीय जनप्रतिनिधि, फ्रेन्डस् हेटौडाका प्रतिनिधि, बिभिन्न संघ संस्थाका प्रतिनिधिहरु, भद्रभलादमी, नेपाल प्रहरी, सशस्त्र प्रहरी बल,नगर प्रहरीहरु समेत गरी दुईसय  जनाको टोलीले सरसफाइ गरेको हो। स्थानीय तथा आवातजावत गर्ने यात्रु समेतलाई अशोभनीय हुने गरी यौनिक तथा लैंगिक अल्पसंख्यक तथा अन्य उच्छृङ्खल व्यक्तिहरुले अनैतिक क्रियाकलाप गरी प्रदुषण एवं दुर्गन्ध समेत फैलाएको भन्ने प्राप्त जनगुनासोको आधारमा त्यस क्षेत्रमा अवलोकन गरी सरसफाई कार्यक्रम अगाडि बढाइएको मकवानपुरका प्रजिअ चिलुवालले बताएका छन् ।सम्बन्धित निकायसंग भएको छलफलबाट यौनिक तथा लैंगिक अल्पसंख्यक  समुदायका केही व्यक्तिले त्यस स्थानमा चलाइरहेको यौन व्यवसायलाई रोक्न नेपाल प्रहरी र सशस्त्र प्रहरीले बेलुकी ७ बजेदेखि बिहान ४ बजेसम्म गस्ती गर्ने निर्णय गरिएको छ भने हेटौंडा उपमहानगरपालिकाले फरेस्टिले पर्खाल लगाउने र लाइट राखिने जनाइएको छ। त्यस स्थानम पार्किङ गरिने ट्रकहरुमा समेत त्यसता क्रियाकलाप हुने गरेको  सूचना प्राप्त भएको कारण नो पार्किङ जोनसमेत बनाइएको छ।  मकवानपुर जिल्ला भित्रका यौनिक तथा लैंगिक अल्पसंख्यक समुदायलाई पहिचान गरि रोजगारीको व्यवस्थाका लागि पहल गर्ने र सुन्दर हेटौंडा, सफा हेटौंडा र  सुरक्षित हेटौंडा बनाउने अभियानमा लागि  बृहत सरसफाई तथा जनचेतना कार्यक्रम संचालन गरिनुको साथै उक्त कार्यक्रमलाई अभियानलाई  निरन्तरता दिने हेटौंडा उपमहानगरपालिकाले जनाएको छ ।