हेटौंडा १२ मा उपनिर्वाचन: तयारी पूरा,वडा क्षेत्र रातिबाटै सिल

१५ मंसिर, हेटाैंडा। हेटौंडा उपमहानगरपालिका–१२ को वडाध्यक्ष पदमा मंसिर १६ गते (भोली) हुने उपनिर्वाचनका लागि सम्पुर्ण तयारी पुरा भएको छ। वडाध्यक्ष पदका लागि हुने निर्वाचनका लागि ४५ जना कर्मचारी खटाइएको छ ।

उक्त वडामा भोर्लेमा रहेको विष्णु आधारभूत विद्यालय र सिग्रेनीमा रहेको प्रतिभा आधारभूत विद्यालय मतदाता केन्द्र रहेको छ।विष्णु आधारभूत विद्यालय मतदान केन्द्रमा ४ वाट केन्द्र र प्रतिभा आधारभूत विद्यालय मतदान केन्द्रमा ५ वटा केन्द्र निर्धारण गरिएको छ। विष्णु आधारभूत विद्यालय मतदान केन्द्र भोर्लेमा ३६२५ मतदाता र प्रतिभा आधारभूत केन्द्रमा ४४२८ मतदाता रहेको जिल्ला निर्वाचन कार्यालय मकवानपुरले जनाएको छ। ९ वटा केन्द्रमा ५ जना कर्मचारीका दरले ४५ जना कर्मचारीलाई मतदान स्थलमा खटाइएको मुख्य निर्वाचन अधिकृत अवानी मैनाली भट्टराई जनाएकी छिन्। खटिएका ४५ जना कर्मचारीलाई मुख्य निर्वाचन अधिकृत अवनी मैनाली भट्टराईले बिहीबार निर्वाचन सामाग्री हस्तान्तरण गरेकी थिइन्। यता मतदान स्थल सुरक्षाको प्रबन्धका लागि ८ वटा प्वाईन्ट बनाईएको मकवानपुरका प्रमुख जिल्ला अधिकारी तीर्थराज चिलुवालले जानकारी दिएका छन् । उनले मतदान हुने अघिल्लो दिन आज रातीदेखि नै मतदान हुने वडालाई सिल गरिने बताए ।

उनका अनुसार, मतदान स्थलको बाहीरी घेरामा नेपाली सेना, भित्री घेरामा सशस्त्र प्रहरी र मतदान स्थलको पहिलो घेरामा आवश्यकता अनुसार नेपाल प्रहरी परिचालन हुनेछ ।सुरक्षा सुदृढ बनाउन राष्ट्रिय अनुसन्धान केन्द्र समेत परिचालन गरिएको उनले बताए ।  ८ हजार ५० मतदाता रहेको उक्त वडामा वडाध्यक्ष पदका लागि १२ जनाले मनोनयन दर्ता गराएका छन् । कांग्रेस, एमाले र माओवादी केन्द्रका उम्मेदवार बिच कडा प्रतिस्पर्धा रहने बुझिएको छ। बिहान ७ बजेदेखि साँझ ५ बजेसम्म मतदानको कार्य तालिका रहेको छ भने मतगणना हेटौंडा २ मा रहेको सिद्धार्थ माविको सभाहलमा हुनेछ।