स्थानीय सरकारले नाकाबन्दी गरेको महेशको अभिव्यक्तिपछि कड्किए मुक्तान

तस्विर माथी अध्यक्ष मुक्तान तल संसद बर्तौला

२६ पुस, हेटौंडा । कैलाश गाउँपालिकाका अध्यक्ष लोकबहादुर मुक्तानले संघीयताको मर्म अनुसार संघ, प्रदेश र स्थानीय सरकार चल्नुपर्ने बताएका छन् ।
मकवानपुरको राक्सिराङ गाउँपालिकाको १७ औं हिउँदे अधिवेशनमा बोल्दै उनले सबै तहका सरकारले आफ्नो कर्तव्य र सिमा बुझेर काम गर्नुपर्ने बताए ।
स्थानीय सरकारले आफ्नो क्षेत्राधिकारभित्रको काम गर्दा संघीय जनप्रतिनिधिले सिन्डिकेटको आरोप लगाएको बताए । उनले संविधानले नै संघीय र प्रदेश सांसदका साथै स्थानीय जनप्रतिनिधिको काम कर्तव्य प्रष्ट गरेकाले चर्चाका लागि अर्काको क्षेत्राधिकार मिच्ने काम नगर्न सुझाव दिए ।
गाउँपालिका राष्ट्रिय महासंघका सचिवालय सदस्य समेत रहेका उनले स्थानीय सरकारको एकल अधिकार अन्य सरकारले हस्तक्षेप गरे प्रतिवाद गर्ने बताए ।
कार्यक्रममा मन्तव्य दिंदै संघीय सांसद महेश बर्तौलाले स्थानीय तहले नाकाबन्दी लगाएको बताएपछि मुक्तानले उनको अभिव्यक्तिको प्रतिवाद गरेका हुन् । 
स्थानीय सरकारलाई संविधान अनुसार वित्तीय हस्तान्तरणमार्फत आएको बजेटलाई संघीय माननीयले आफुले हालेको भनेर भ्रामक प्रचार गरेको बताए ।
कार्यक्रममा बोल्दै संघीय सांसद वर्तौलाले आफुहरू जनताको माझ जाने माध्यम पालिकाहरू रहेपनि पालिकाहरूले नाकाबन्दी लगाएको बताएका थिए । यसले आफुले जनताको समस्या फेसबुकबाट थाहा पाउनुपर्ने अवस्था रहेको बताए । उनले यस्तो प्रवृतिको अन्त्य हुनुपर्ने उनको धारणा थियो ।