भारतीय राजदूत श्रीवास्तवले उपराष्ट्रपतिलाई भेटे

५ माघ, हेटौंडा । नेपालका लागि भारतीय राजदूत नवीन श्रीवास्तवले उपराष्ट्रपति रामसहाय प्रसाद यादवसँग भेटवार्ता गरेका छन् । लैनचौरस्थित उपराष्ट्रपतिको कार्यालयमा शुक्रवार भेट भएको हो । भेटमा दुई मुलुक बिचको द्विपक्षीय सम्बन्ध, उच्चस्तरीय भ्रमण, आर्थिक सहयोग, नेपालको विकास प्राथमिकताहरू, क्षेत्रीय तथा अन्तर्राष्ट्रिय मञ्चहरूमा सहयोग र सहकार्य लगायतका विषयमा छलफल भएको बताइएको छ ।
भेटमा यादवले दुई देशबिचका सम्बन्धहरू सार्वभौमिक समानता, असल छिमेकीपन, आपसी सम्मान र पारस्परिक विश्वासका सिद्धान्तमा आधारित रहेको बताउँदै नेपाल र भारतबिच सामाजिक, सांस्कृतिक, धार्मिक, आध्यात्मिक, आर्थिक सम्बन्ध एवं जनस्तरको घनिष्ठ सम्बन्धको शताब्दीयौं पुरानो परम्परा रहेको स्पष्ट पारे ।
राजदूत श्रीवास्तवले भारतले ‘नेबरहुड फस्ट’ नीतिलाई निरन्तर अघि बढाएको उल्लेख गर्दै गहुँ निर्यातमा प्रतिबन्धका बाबजूत नेपालाई दुई लाख टन गहुँ निर्यातका लागि अनुमति दिएको बताए । भैरहवामा भारतले यसै वर्ष सम्पन्न हुनेगरी एकीकृत सुरक्षा जाँच चौकी निर्माण गरिरहेको उल्लेख गर्दै उनले नेपाललाई भारतले एक हजार चौसट्ठी मेगावाट बिजुली आपूर्ति गरिरहेको र बाढीका बेला १० वटा बेलीब्रिज पनि हस्तान्तरण गरेको बताए ।