भेट्रान्स कप: फ्रिडम फाईटर, नागस्वती, बगरभाई र किङकम क्वाटर फाइनलमा

२३ फागुन, हेटौंडा । हेटौडामा जारी दशौं राष्ट्रिय हेटौंडा भेट्रान्स कप एट ए साइड रनिङ शिल्ड फुटबल प्रतियोगिता अन्तर्गत शुक्रवार चार खेल सम्पन्न भएका छन् । 
हेटौँडा भेट्रान्स क्लबको आयोजनामा हेटौडा-४ स्थित हुप्राचौरमा जारी प्रतियोगिता अन्तर्गत शुक्रवारको पहिलो खेलमा फ्रिडम फाइटर ठमेल विजयी भएको छ । फ्रिडमले चितवन भेट्रान्सलाई २-० गोल अन्तरले पराजित गर्न सफल भएको छ । खेलको दोस्रो हाफको ४२ औं मिनेटमा फ्रिडमका तर्फबाट राजकुमार केसीले एक गोल र ४९ औं मिनेटमा कृष्ण मालाकारले एक गोल गर्दै फ्रिडमलाई विजयी बनाउन सफल भएका थिए । खेलको म्यान अफ द म्याच फ्रिडम फाइटर भेट्रान्सका खेलाडी राजकुमार केसी घोषित भएका थिए ।
दोस्रो खेलमा नागस्वती भेट्रान्स विजयी भएको छ । नागस्वतीले सिमरा भेट्रान्सलाई ३-० गोल अन्तरमा पराजित गर्न सफल भएको थियो । नागस्वतीको तर्फबाट खेलको छैठौं र १९ औँ मिनेटमा निमा लामाले दुई गोल गरेका थिए भने १० औं मिनेटमा प्रकाश राना मगरले एक गोल गर्दै टिमलाई विजयी बनाउन सफल भएका थिए । खेलको म्यान अफ द म्याच नागस्वती भेट्रान्सका खेलाडी निमा लामा घोषित भएका थिए ।
यस्तै, तेस्रो खेलमा बगर भाईखलक पोखरा विजयी भएको छ । खेलको दशौँ मिनेटमा बागरभाइको तर्फबाट राजकुमार तामाङले एक गोल गरेका थिए भने एनजेजे भिसी भेट्रान्सको तर्फबाट खेलको २९ औ मिनेटमा दिलकुमार कार्कीले एक गोल गरेका थिए । निर्धारित समयमा दुबै टिमबाट १/१ गोल भएपछि खेल ट्राईब्रेकरमा पुगेको थियो । ट्राईब्रेकरमा बगरभाईले ४-३ गोल अन्तरमा पराजित गर्न सफल भएको थियो । खेलको म्यान अफ द म्याच बगर भाईखलकका खेलाडी हिमाल थापा घोषित भएका थिए ।
यस्तै आजको चौथो खेल किङकम भेट्रान्स काठमाडौँ र बुटवल भेट्रान्स बिच हुने तालिका रहे पनि प्राविधिक कारण बुटवल भेट्रान्स अनुपस्थित भएपछि किङकम भेट्रान्स विजयी भएको छ । 
प्रतियोगितामा शनिबार चार क्वाटर फाइनलका खेलहरू हुने प्रतियोगिताका संयोजक मणिराज गौतमले बताए । शनिवार पहिलो खेल दिउँसो १ बजे बानेश्वर भेट्रान्स र एबिसि भेट्रान्स बिच हुनेछ भने दोस्रो खेल बगर भाईखलक पोखरा र किङकम भेट्रान्स बिच दिउँसो २ बजे हुने तालिका रहेको छ । यस्तै तेस्रो क्वाटर फाइनल खेल फ्रिडम फाइटर र नागस्वती भेट्रान्स बिच दिउँसो ३ बजे हुने तालिका रहेको छ । यसै गरी चौथो खेल आयोजक हेटौंडा भेट्रान्स र बौद्ध भेट्रान्सबीच हुनेछ ।