मकवानपुरमा ७ गाउँपालिका

६ असोज, हेटौँडा । स्थानीय तह पुनर्संरचना प्राविधिक सहयोग समितिले मकवानपुरमा ७ गाउँपालिका प्रस्ताव गरेको छ । जिविसका योजना अधिकृत किसान न्यौपाने नेतृत्वको प्राविधिक समितिले स्थानीय निकाय पुर्नसंरचना आयोगका अध्यक्ष बालानन्द पौडेललाई बुझाएको प्रतिवेदनमा ७ गाउँ, १ नगर र १ उपमहानगरसहितको खाका पेश गरेको हो । समितिले राजनैतिक दलहरुले प्रस्ताव गरेको बैकल्पिक प्रतिवेदन समेत आयोगलाई बुझाएको छ ।

कस्तो छ त प्रतिवेदनमा स्थानीय तहको पुर्नसंरचनाको खाका ?
१) बागमति गाउँपालिका–राईगाउँ, फापरवारी र बेतिनि गाविस
२) बकैया गाउँपालिका–धियाल, शिखरपुर, छतिवन, मन्थली र ठिंगन गाविस
३) इन्द्रसरोवर गाउँपालिका– ईपा, कोगटे, सिस्नेरी, कुलेखानी, मार्ख र फाखेल गाविस
४) भीमफेदी गाउँपालिका– आमभञ्ज्याङ, सुकौरा, बुढिचौर, निबुवाटार, भैंसे, र भीमफेदी गाविस
५) बैकुण्ठ वा मेन्दोलिङ गाउँपालिका– नामटार, कालिकाटार, भार्ता, गोगने र डाँडाखर्क गाविस
६)  राक्सिराङ गाउँपालिका– सरिखेत, राक्सिराङ, काँकडा र खैराङ गाविस
७) राप्तिदुन गाउँपालिका– मनहरी र हाँडिखोला गाविस
८) थाहा नगरपालिका– थाहा नगरका दामन, पालुङ, बज्रबाराहीसहित आग्रा, टिष्टुङ र चित्लाङ गाविस
९) हेटौँडा उपमहानगरपालिका–पुरानो हेटौँडा नगर, पछि थपिएका हटिया, हर्नामाडि, चुरियामाई, पदमपोखरी, बसामाडिसहित मकवानपुरगढी गाविस

राजनैतिक दलहरुले पुरानो इलाकालाई नै स्थानीय तह बनाउनुपर्नेदेखि १२ तहसम्मको प्रस्ताव गरेका छन् । समितिले भने स्थानीय तहमा आफुले छलफल गराएको खाका नै प्रतिवेदनको रुपमा बुझाएको छ । जिल्लास्थित प्राविधिक समितिको सिफारिसलाई आयोगले अन्तिम रुप दिई पुनः जिल्लामा छलफल हुने जनाईएको छ । स्थानीय तहमा भएका छलफलमा जनसंख्यालाई बढि महत्व दिईएको र भौगोलिक क्षेत्रलाई महत्व नदिएको गुनासो विभिन्न क्षेत्रका स्थानीयको रहेको छ । प्राविधिक समितिको प्रस्तावमा सुकौराका स्थानीय र आमभञ्ज्याङका पत्रकारले समेत असन्तुष्टि जनाएका थिए ।

तस्विर : जिविस मकवानपुर