सभापति चयन नगरी सकियो बैठक

३० बैशाख, हेटौँडा । ३ नम्बर प्रदेशको राजधानीबारे अध्ययन गर्न बसेको समितिको पहिलो बैठक सभापति चयन नगरी सकिएको छ । प्रदेशसभाबाट बैशाख १४ गते गठित समितिले आइतबारबाट काम थालेको थियो ।

पहिलो बैठकले १३ सदस्यीय समितिबाट सभापति चयन गर्ने र कार्यविधि बनाउने भनिए पनि बन्दका कारण सबै सदस्यहरु आउन नसकेपछि सामान्य छलफलमात्रै भएको छ । ज्येष्ठ सदस्य सरस्वती बस्नेतको अध्यक्षतामा बसेको बैठकमा समितिले कसरी अघि बढ्ने भन्नेबारेमा प्रारम्भिक छलफल भएको र सोमबार पनि बैठक बस्ने निर्णय भएको छ । समितिलाई कार्य प्रारम्भ गरेको ४५ दिनभित्र प्रतिवेदन बुझाउने अवधी दिईएको छ ।

प्रदेश राजधानीबारे छलफलका लागि काभ्रे र भक्तपुरका प्रदेश सदस्यहरुले छुट्टाछुट्टै र रसुवा र नुवाकोटका प्रदेशसभा सदस्यले संयुक्त रुपमा प्रस्ताव दर्ता गरेपनि कार्यसूचिमा नराखिएपछि ३८ जना प्रदेशसभा सदस्यले निवेदन दर्ता गराएका थिए । त्यसपछि सभामुख सानुकुमार श्रेष्ठले अध्ययन समिति गठन गरेका थिए ।

समितिमा एमालेका तर्फबाट दिपक निरौला, सरस्वती बस्नेत, बिजय सुवेदी, वसन्त मानन्धर, डा.रामकुमार अधिकारी, माओवादी केन्द्रबाट विशाल खड्का, जगत सिंखडा, काँग्रसबाट छिरिङ दोर्जे लामा, प्रभात तामाङ, विवेकशिल साझाका बिराजभक्त श्रेष्ठ, नेमकिपाका सुरेन्द्रराज गोसाई, राप्रपाकी रिता माझी र राप्रपा प्रजातान्त्रिकबाट रिना गुरुङ छन् ।