प्रदेश आकस्मिक कोषमा ५ करोड रहने

२० जेठ, हेटौँडा । ३ नम्बर प्रदेशको प्रदेशसभा बैठकमा आइतबार ‘प्रदेश आकस्मिक कोष सम्बन्धमा व्यवस्थापन गर्न बनेको विधेयक २०७५’ प्रस्तुत भएको छ । प्रदेशसभा भवन हेटौँडामा बसेको बैठकमा आर्थिक मामिला तथा योजना मन्त्री कैलाश ढुंगेलले विधेयक प्रस्तुत गरेका हुन् ।

विधेयकमा प्रदेश संचित कोषबाट ५ करोड रुपैँया झिकि प्रदेश आकस्मिक कोषमा राख्नुपर्ने र खर्च हुना साथ सोधभर्ना गर्नुपर्ने उल्लेख छ । बैठकमा विधेयकमाथिको सैद्धान्तिक छलफलमा प्रदेशसभा सदस्यहरुले विधेयकले प्राकृतिक वा गैर प्राकृतिक विपद लगायतका आकस्मिक कार्यमा कोष खर्चिने जनाईएको भन्दै यसलाई विपद् न्यूनिकरणका पूर्व तयारीमा पनि खर्च गर्ने व्यवस्था हुनुपर्ने धारणा राखेका थिए ।

उनीहरुले कोषमा रकम जम्मा हुने नियमित स्रोतको व्यवस्था गर्ने विधि कस्तो हुन्छ भन्नेबारेमा जिज्ञासा राखेका थिए । उनीहरुको जिज्ञासको जवाफ दिंदै मन्त्री ढुंगेलले सुझावलाई सम्पत्तिको रुपमा लिई आवश्यकता अनुसार विधेयकमा समावेश गरिने बताए । छलफलमा प्रदेशसभा सदस्यहरु छिरिङ दोर्जे लामा, मिना ज्ञवाली, न्हुच्छेनारायण श्रेष्ठ, भावना सुवेदी, विराजभक्त श्रेष्ठ, नरोत्तम बैद्य, डा. राजेन्द्रमान श्रेष्ठले धारणा राखेका थिए ।