'राज्यले सामाजिक सुरक्षाका लागि काम गर्नुपर्छ'

१० असोज, हेटौँडा । मानवअधिकारकर्मी सुबोध प्याकुरेलले राज्यले जनताको सामाजिक सुरक्षाका लागि काम गर्नुपर्नेमा जोड दिएका छन् । शान्तिको लागि साझा अभियान (कोक्याप) ले सोमबार हेटौँडामा गरेको नेपालमा सामजिक सुरक्षा नीति तथा कार्यत्रलम कार्यन्वयन अध्ययन प्रतिवेदनमाथि छलफल एवम् क्षेत्रीय सम्मेलनमा बोल्दै अधिकारकर्मी प्याकुरेलले सामाजिक सुरक्षाको प्रत्याभुति भए समाजमा शान्ति कायम हुने बताए ।

उनले भाषणले मात्रै शान्ति नआउने भन्दै यसका लागि व्यवहारिक ढंगबाट अघि बढ्नुपर्नेमा जोड दिए । मर्यादामा आउने आँचकै कारण समाजमा अशान्ति बढेको भन्दै यसका लागि सम्मानजनक ढंगले बाँच्न पाउने अवस्थाको सिर्जना गर्नु जरुरी रहेको उनको भनाई थियो । उग्रजातिबादी सोचले कसैको हित नहुने भन्दै यसतर्फ सचेत हुन सबैलाई आग्रह गरे । उनले तल्लो तहलाई लक्षित गरी हुने विकासले मात्रै सामाजिक न्याय गर्ने बताए ।

कोक्यापका मध्यमाञ्चल अध्यक्ष पुष्पराज पौडेलको अध्यक्षतामा भएको कार्यक्रममा मानवअधिकारकर्मी चरण प्रसाई, बाबुराम गिरी लगायतले मन्तब्य ब्यक्त गरेका थिए । विभिन्न जिल्लाको अध्ययन गरी तयार पारेको प्रतिवेदनलाई क्षेत्रीयस्तरमा छलफलपछि आएको सुझावको आधारमा अन्तिम प्रतिवेदन तयार हुने कोक्याप प्रतिनिधि दिपेन्द्र ढकालले बताए ।