प्रदेश ३ को बैठक अर्को सूचना नभएसम्म स्थगित

४ साउन, हेटौँडा । प्रदेश सभा ३ को शुक्रबारको प्रदेशसभा बैठक अर्को सूचना नभएसम्मका लागि स्थगित भएको छ । शुक्रबार विहान ११ बजेका लागि प्रदेशसभा भवन हेटौँडामा बस्ने भनिएको बैठक स्थगित भएको हो । 
प्रदेशसभा सचिवलायलले सूचना टाँसेर अर्को सूचना नभएसम्मका लागि प्रदेशसभा बैठक स्थगित भएको जनाएको छ । विहान ११ बजेका लागि बोलाईएको प्रदेशसभा बैठक विशेष कारणबश अर्को सूचना नभएसम्मका लागि सभामुखको आदेश अनुसार स्थगित गरिएको प्र्रदेशसभाका निमित्त सचिव मोहन निरौलाद्वारा जारी सूचनामा उल्लेख छ । शुक्रबार बसेको कार्यव्यवस्था परामर्श समितिको बैठकमा नेपाली कांग्रेसले आफुहरुको माग सम्बोधन नभएसम्ममा प्रदेशसभा बैठक अघि बढन् नदिने अडान राखेको थियो । 
शेरबहादुर देउवा नेतृत्वको अघिल्लो सरकारले ल्याएको अध्यादेशको मर्म विपरित चिकित्सा शिक्षाको प्रतिस्थापन विधेयक ल्याउन लागेको, संविधान विपरित सभामुख र उपसभामुख एकै दलको भएको, प्रदेशसभाले भूकम्प प्रभावितलाई वेवास्ता गरेकोे, उद्योग बर्ष घोषणा गरेपनि कर बृद्धि गरेको, मूल्यवृद्धि भएको, सिमेन्ट, गिट्टी, ढुंगा, वालुवामा अध्याधिक कर लगाइएको, संविधान विपरित आर्थिक विधेयकमा जनयुद्ध शव्द प्रयोग गरेको लगायतका मुद्धा कांग्रेसले उठाएको छ । 
यी मुद्धा अघि सारेर कांग्रेसले विहिबार पनि प्रदेश सभा बैठक पनि अवरुद्ध गरेको थियो । कांग्रेसले अवरोध गरेपछि शुक्रबारसम्मका लागि बैठक स्थगित गरिएको थियो ।