टिमुरे पहिरोमा मृत्यु हुनेको संख्या ८ पुग्यो

१० साउन, हेटौँडा । रसुवाको गोसाइकुण्ड गाउँपालिका–२ टिमुरेमा बुधबार राति गएको पहिरोमा परी मृत्यु हुनेको संख्या ८ पुगेको छ । एक जना अझै बेपत्ता छन् ।

पहिरोमा परी गोसाइकुण्ड गाउँपालिका –१ थुमनका मिङ्मार गुम्बु तामाङ, गाउँपालिका–२ टिमुरेका दोर्जे वाङजु घले, सिन्धुपाल्चोकको भोटेकोशी गाउँपालिका–५ का श्याम श्रेष्ठ, बिक्रम श्रेष्ठ र मंगले तामाङ, भोटेकोशी–४ का रेशम खड्का, नुवाकोटका रमेश तामाङ र शर्मिला कमिनिको मृत्यु भएको जिल्ला प्रहरी कार्यालय रसुवाले जनाएको छ । पहिरोमा परी १२ जना घाइते भएका छन् ।  गम्भिर अवस्थाका ५ जनालाई थप उपचारका लागि काठमाडौं पठाईएको रसुवाका प्रमुख प्रहरी नायब उपरीक्षक सन्तोष तामाङले जानकारी दिए ।  ७ जना उपचार पछि घर फर्किएका छन् ।

प्रमुख जिल्ला अधिकारी कृष्ण पौडेलले मृतकका परिवारलाई तत्काल नगद १ लाख राहत उपलब्ध गराउने जनाएका छन् ।  पहिरोमा अस्थायी प्रहरी बिट, २ वटा टहरा र एक होटेल समेत पुरिएको छ भने २ वटा कन्टेनर र एउटा ट्रकमा क्षति पुगेको प्रहरीले जनाएको छ । प्रशासनले घर टहरा भत्केकालाइ तत्काल राहत स्वरुप १० हजार र घर निर्माण गर्न थप ५० हजार रुपैयाँ उपलब्ध गराउने भएको छ ।