‘गलत रवैयाविरुद्ध कांग्रेस प्रतिकारमा उत्रन्छ’

१२ साउन, हेटौँडा । नेपाली कांग्रेस हेटौँडा नगर कार्यसमितिको आयोजनाको हेटौँडामा एक दिने प्रशिक्षण कार्यक्रम शुरु भएको छ ।

कार्यक्रम उद्घाटनमा बोल्दै नेपाली कांग्रेसका केन्द्रीय सदस्य महालक्ष्मी उपाध्याय डिनाले वर्तमान सरकारको गलत रवैया बढ्दै गएको भन्दै यसको प्रतिरोधका लागि कांग्रेस कार्यकर्ताहरु तयार रहनुपर्नेमा जोड दिईन् । उनले कांग्रेसले अब सरकारका हरेक गलत कार्यका विरुद्ध सदन र सडकबाट संघर्ष गर्ने भन्दै यसको पहिलो कार्यक्रम साउन १५ गते हुन लागेको बताईन् । 

नेपाली कांग्रेस मकवानपुरका सभापति एवं ३ नम्बर प्रदेश संसदीय दलका नेता ईन्द्रबहादुर बानियाँले नेपाली कांग्रेस जनतासंगमात्रै झुक्ने र कुनै पनि तानाशाही प्रवृत्ति विरुद्ध नझुक्ने बताए । उनले जनता उठ्नै नसक्ने गरी कर बढाउने सरकार जनता विरोधी भएको भन्दै यस्तो सरकारबाट कुनै सकारात्मक कामको अपेक्षा गर्न नसकिने बताए । उनले संघीय र प्रदेश सरकारमा सभामुख र उपसभामुख फरक पार्टी र लिंगको हुनुपर्ने संवैधानिक व्यवस्थालाई समेत वर्तमान सरकारले मिचेको भन्दै यसविरुद्ध कांग्रेसले प्रतिकार गर्ने बताए । कार्यक्रममा प्रदेशसभा सदस्य सन्तबहादुर प्रजाले जनताको हितमा काम गर्ने नेपाली कांग्रेस नै जनताको पार्टी भएको बताउँदै आगामी दिनमा पनि निरन्तर जनताको साथमा रहने बताए ।

नेपाली कांग्रेसका केन्द्रीय प्रवक्ता विश्वप्रकाश शर्माको प्रमुख आतिथ्यता एवं नगर सभापति आनन्दराम पराजुलीको अध्यक्षतामा कार्यक्रम भएको हो । हेटौँडा उपमहानगरभित्रका कांग्रेसका वडाका पदाधिकारी, स्थानीय तहका उम्मेदवार, विभिन्न पार्टी परित्याग गरी कांग्रेसमा आवद्ध अगुवा कार्यकर्ताहरुको सहभागिता रहेको कार्यक्रममा केन्द्रीय प्रवक्ता शर्माले प्रशिक्षण दिईरहेका छन् ।