टिपर लैजान खोज्दा प्रहरी र स्थानीयबीच झडप

हेटौँडा, २१ साउन । मोटरसाइकललाई ठक्कर दिने टिपर लैजाने क्रममा हेटौँडा उपमहानगरपालिका–१७ गैरीगाउँमा सोमबार दिउसो झडप भएको छ ।

टिपरको ठक्करबाट मोटरसाइकल चालकको मृत्यु भएपछि स्थानीय आइतबार दिउसो १२ बजेदेखि कान्तिलोकपथ अवरुद्ध गर्दै टिपर लैजान रोक लगाएका थिए । सोमबार दिउसो प्रहरीले बल प्रयोग गरेर टिपर लैजान खोजेपछि झडप भएको थियो । पीडित परिवारलाई उचित राहत, घाइतेको उपचार, टिपर चालकलाई कारबाही, सडक क्षमता भन्दा बढि सामान बोक्ने सवारी संचालनमा रोक लगाउनुपर्ने लगायतको माग गर्दै स्थानीयले आइतबार दिउँसो १२ बजेदेखि सडक समेत अवरुद्ध गरेका थिए । प्रहरीले बल प्रयोग गरेर सोमबार अपरान्ह ४ बजे यातायात सुचारु गरेको हो ।

स्थानीयले ढुंगा प्रहार गर्न थालेपछि प्रहरीले ७ सेल अश्रुग्याँस समेत प्रहार गरेको थियो । घटनास्थलमा जिल्ला प्रहरी कार्यालयका प्रहरी निरीक्षक मधुकुमार थापाको कमाण्डमा ५० जना भन्दा बढि प्रहरी खटिएका थिए । प्रहरीले ठक्कर दिने टिपर हेटौँडा उपमहानगरपालिकाको जेसिबि प्रयोग गरी जिल्ला प्रहरी कार्यालय मकवानपुर पु¥याएको छ । घटनामा संलग्न भएको भन्दै प्रहरीले नेपाल तरुण दल हेटौँडा नगर अध्यक्ष सुनिल गिरी, हरिशरण थापा, रणबहादुर श्रेष्ठसहितलाई पक्राउ गरेको छ । 

आइतबार हेटौँडाबाट गैरीगाउँतर्फ गइरहेको ना ७ ख ७२२३ नम्बरको टिपरले विपरीत दिशाबाट आइरहेको बा ४२ प ७०७० नम्बरको मोटरसाइकललाई ठक्कर दिँदा मोटरसाइकल चालक २६ बर्षीय टंक न्यौपानेको मृत्यु भएको थियो ।

मोटरसाइकलमा सवार गिता न्यौपाने घाइते भएकी छिन् । उनको चितवनमा उपचार भईरहेको छ । वार्ताबाट समस्या समाधान गर्न प्रशासनले वेवास्ता गरेको स्थानीयको आरोप छ । सोमबार दिनभर जिल्ला प्रहरी कार्यालय मकवानपुरमा प्रहरी र स्थानीयबीच वार्ता भएपनि सहमित नजुटेपछि स्थानीय आक्रोशित बनेका छन् ।